Nongstoiñ, Risaw 09: Ka Ophis jong ka District Medical & Health Officer West Khasi Hills District, ha ka sngi palei ka la pynlong ïa ka prokram rakhe ïa ka sngi pyrshah Duma ha Nongstoiñ Complex Auditorium, New Nongstoiñ.
La pynlong ïa kane ka prokram ban pynsngewthuh ïa ki khynnah skul bad ïa ki paidbah shaphang ki jingma bad ki jingktah sniew jong u Duma bad Nicotine, kumjuh ruh ban pynshlur ïa ki ban kiar na ka jingpyndonkam ïa u Duma.
Ka Dr M. K. Sohliya DM&HO West Khasi Hills District, ka la ai ïa ka jingkren pdiang bad ka la batai ruh shaphang ka jingkongsan jong ka sngi pyrshah Duma. Ka Dr N. Mawrie, State Nodal Officer NTCP bad NOHP, ka la ai ïa ka jingkren pdeng, ha kaba ka la pynpaw ïa ka jingdonkam ban bteng ïa ki lad ki lynti ban khanglad ïa ka jingpyndonkam ïa u Duma bad nicotine, khamtam hapdeng ki samla.
Katba na ka liang u Kongsan Bah Gabriel Wahlang, ha ka jingkren jong u, u la ong ba ka jingim, ka ïing ka sem bad ka koit ka khiah ki long kiba kordor. U la ong ruh, “Ki rai kiba ngi shim ha ka por ba ngi dang samla ki lah ban ktah ïa ka jingim jong ngi ha ki snem kiba wan”.
U la pynkynmaw ïa baroh ba ka koit ka khiah ka dei ka spah bah bad u la kyntu ïa ki paidbah ban kiar na u Duma, la ka long ka jingdih ne ka jingbam, namar u Duma u lah ban ktah ïa ka met baroh bad ïa ka jingmut jingpyrkhat. U la ai ruh ïa ka khubor kaba ong Em ïa u Duma bad Hooid ïa ka jingim.
U Dr B. Myrthong u la batai shaphang ki jingma kiba lah ban mih na ka jingpyndonkam ïa u Duma. Ka Police Department ruh ka la ai ïa ka jingpynsngewthuh lyngkot halor ka Cigarettes and Other Tobacco Products Act (COTPA) 2003 bad ki kyndon kiba kongsan kiba ïadei bad ka jingtehlakam ïa u Duma.
La pynlong ruh ïa ka jingïatyrko kum shibynta jong ka prokram, ha kaba ka Kopalful Sohphoh na St. Joseph Seminary ka la ïoh ïa ka kyrdan kaba nyngkong , ka Graceful Lyngdoh Marshillong na Laitkseh Govt. UPS ka la wan ba ar, katba u Sanborlang Kharsyntiew na Seng Samla Siejlieh u la ïoh ïa ka kyrdan kaba lai.
Ka NTCP Team ka la sam ruh ïa ki khusnam sha ki skul kiba wan shakhmat ha ka Tobacco-Free Educational Institutions (TOFEI) ha ka kyrdan District, bad ïa ki khusnam kiba ïadei bad ka jingpyntreikam ïa ka COTPA bad ka Online Slogan Competition.
Ki skul kiba wan shakhmat ha ka TOFEI ha ka kyrdan District ki long, ka Japung Pres LPS ha ka kyrdan Primary, St. Thomas RCUPS ha ka kyrdan Upper Primary, St. Thomas Secondary School Nongjri ha ka kyrdan Secondary bad Nonglang Higher Secondary School ha ka kyrdan Higher Secondary.
U Dr L.L. Mawsor, District Nodal Officer NTCP & NOHP, West bad Eastern West Khasi Hills District, u la ïashim bynta lang ha kane ka prokram. Na ka Education Department, la wan mihkhmat da ka kong A.Kharbhih, DSEO bad u Bah E. Marngar, SDSEO.
La pynlong ruh ïa ka jingkular (pledge) bad ka graffiti kum shibynta jong ka prokram, ban pynskhem ïa ka jingkut jingmut jong ki nongïashimbynta ban kiar na u Duma bad ban ïatreilang ban teh lakam ïa ka jingpyndonkam ïa u Duma.
