Nongpoh, Risaw 09: Ka jingtei thymmai jong ka Umdohkha Nongtluh Government LP School ka la long ka jingkyrkhu ïa ki khynnah pule bad ki nongshong shnong ka Umdohkha, hadien ba la plie paidbah ïa ka building skul thymmai da u MLA ka Nongpoh, Bah Mayral Born Syiem, uba long ruh u Chairman jong ka Meghalaya State Health Advisory Board, ka sorkar Meghalaya.
Ïa u mawnongrim jong kane ka building la buh ha u snem 2024, bad hapoh ar snem ka jingtei ka la dep, ha ka jinglut kaba palat T. 44 lak, lyngba ka skhim Mission Education jong ka tnat pule puthi jong ka sorkar jylla.
Ha kane ka sngi, la donlang u P. P. Yadav, SDSEO ka Ri-Bhoi District; u Bah Shalping Khymdeit, Rangbah Shnong Umdohkha, u Bah Beding Syngkli, Chairman jong ka School Managing Committee, ki nonghikai, ki kmie ki kpa, ki khynnah skul bad ki nongshong shnong.
Katkum ka jingïathuh da ki nongkren ha ka jingïalang, ïa kane ka skul la seng nyngkong da ka Balang ha u snem 1952, ha kaba ki nongïalam ki la trei shitom ban pynïaid ïa ka lyngba ka jinglum da u khaw kham na man ki tnum iing. Hadien katto katne por, la aiti ïa ka jingpynïaid sha ka Block, nangta sha ka District Council, bad mynta ka skul ka hap hapoh ka jingpynïaid jong ka sorkar jylla.
Katba dang ïaid ki snem katei ka skul ka la nang kiew ha ka liang ka pule puthi, bad mynta ka don haduh 126 ngut ki khynnah pule.
Ka jingplie ïa kane ka building thymmai ka long ka sienjam kaba kongsan ban kyntiew ïa ka pule puthi ha ki shnong nongkyndong. Ka jingdon ïa ka skul kaba biang bad kaba bit ka lah ban wanrah ïa ka sawdong sawkun kaba kham bha ha ka jingpule, bad ban ai ïa ki khynnah ka lad ban tei ïa ka lawei kaba kham phyrnai namar ka skul kam dei tang ka jaka ban pule, hynrei ka dei ka nongrim ban saiñdur ïa ka lawei jong ki khynnah.
