Shillong, Risaw 7: Haba kyntait ïa ki khubor hamsaia ba ka BJP kala pyrshang ban tan ïa ki MLA ka NPP, u State President ka BJP Meghalaya u Rikman G Momin ha ka sngi Ba-ar, ula ong ba ka jingkylli kam mih satia ba ngin leit ïakren ïa ki MLA jong ka paralok lajong.
“Balei ngin leit ïakren? Ka NPP ka dei ka paralok jong ngi bad la ai jaka ïa ngi ha kane ka Sorkar MDA.Balei ba ngin leh ïa kata? Kine baroh ki dei ki khubor hamsaia ki bym donkam bala pynsaphriang” ong u Momin.
Haba kylli la ka BJP kan dawa kham bun ka shuki Myntri hadien ba kiew ka jingdon MLA sha ka 10 ngut ha Iingdorbar Thaw Ain, ula ong “Ngim shym la dawa eiei ruh em”.
Hynrei, ula ong ba ka jingkhang jong ka BJP ka plie lut ïa baroh ba kin wan ïasoh.
“Kito kiba kwha ban ïasoh BJP bad kito kiba kwah ban trei na ka bynta ki paidbah ka Meghalaya, ngi pdiang ïa baroh ban wan ïasoh” ula ong.
Haba kylli la ka party kan leit ïakren ïa ki MLA ka TMC, u Momin ula ong “Mano mano ruh ki lah ban wan ïasoh sha ka party.Ngam shym pynïadei kyrpang ïalade bad ka NPP lane mano mano ruh.Kiba kwah ïasoh ki lah ban wan”.
Haba kynthoh ïa ki jingkam ba ki MLA ka NPP kila ïoh pdiang ïa ka jingkhot ban wan ïasoh sha ka BJP, ula kop da kaba ong “Wanrah sha nga ïa uta u MLA ka NPP khnang ba lada u lah ban pyni ïano ïano na ka BJP kiba la leit ïakren bad u”.
Halor ki khubor ba ka party ka ïoh ïa ki email ba byrngem, ula ong “Em, Ngam tip ïa kata.Ka BJP kam pat ïoh pdiang ïa ki email ba shah byrngem.Mano ba ïathuh ha phi ïa kata? Lada ka don ngin ujor da ka ejahar”.
