Shillong Risaw 07: Ka Toastmasters International, kaba dei ka kynhun kaba don ha kylleng satlak ki ri, kala ïoh mynta ban suhthied ha ka jylla Meghalaya da ka jingseng ïa ka Shillong Toastmasters Club, kaba la ïoh ban pynlong ïa ka jingïalang ha ka sien kaba nyngkong ha ka Sngi u Blei jong ka taïew ha Shillong Club.
Ha ka jingrakhe ïa ka jingsdang ïa kane ka Shillong Toastmasters Club, la wan ban plie da u Chief Electoral Officer ka Meghalaya u B.D.R. Tiwari uba la ai jingkren kyrpang ha kane ka jingïalang halor ka jingkongsan ban long kiba tbit bad ai jingkren, ban long kiba skhem jingmut bad ban long ki nongïalam ha kino kino ki bynta kiba ïadei bad ki paidbah.
Ïa ka Toastmasters International la seng ha u snem 1924 bad kala suhthied ha kylleng ki ri bad mynta kane ka kynhun ha ka sien kaba nyngkong eh, kala ïoh ban pynïar ïa ka shnad treikam jong ka hapoh ka Nongbah Shillong.
Kane ka Club kan ïaleh ban saiñdur ïa ka sap ka phong ha ka ban ai jingkren bad ban don ïa ka jingtbit ban long kum ki nongïalam bad ban ïai kiew shaphrang.
Ha kane ka kynhun ha ka Jylla ka kynthup ïa ki riewshimet kiba trei ba ktah ha ki liang bapher bapher naduh ki Engineer, Nongïasaid aiñ, Nongkhaïi, ki riewpawkhmat bad kiwei kiwei.
Ha kane ka jingïalang la pynithuh ruh ïa ki nongkitkam jong ka Shillong Toastmasters Club hapoh ka jingïalam ka President ka Preity Agarwal, ka Diksha Sureka Gupta ka Vice President Education, u Naveen Singhania u Vice President (Membership) bad ka Nivisha Chamaria ka Vice President (Public Relations), u Gunjan Jhunjhunwala kum u Secretary, u Pragya Agarwal kum u Treasurer bad ka Prerna Jhunjhunwala kum ka Sergeant at Arms (SAA).
