Nongstoiñ, Naitung, 30: Hadien bun phew tylli ki snem ba ki paidbah nongshong shnong ka thaiñ Langshongthiang bad thaiñ Jaïaw Mawshynrut, ki la mad ïa ki jingeh ba ha rukom namar ka jingbym don ki surok ba biang. Hynrei mynta ka kynti pat ki nongshong shnong ki la pynpaw ïa ka jingkmen, hadien ba ka sorkar lyngba u MLA ka thaiñ u Bah Gigur Myrthong, u la pynïoh ïa ka mang tyngka kaba haduh 22 klur tam, na ka bynta ban shna ïa ka surok rong ba 13 kilometer na Umdang sha Nongjaïaw, kaba la ïaid shait shait haduh mynta.
Ka jingpyntrei ïa katei ka surok ba 13 kilometer, ka dei lyngba ka scheme PMGSY Phase-II bad lyngba kane ka surok ki don haduh phra tylli ki shnong ki ban ïoh jingmyntoi. Ki paidbah nongshong shnong ka thaiñ Langshon-thiang bad Jaïaw bad ki shnong ba marjan, ki la pynpaw ïa ka jingsngew-kmen bakhraw hadien ba u MLA ka thain u Bah Gigur Myrthong, u la shimkhia na ka bynta ban wanrah ïa ki kam pynroi ha ka thaiñ khamtam ka surok kaba long u budlum ha ka ïoh ka kot, ka ïaid ka ieng bad ka kit ka bah.
Haba ïakren bad ki nongthoh khubor, na ka liang u Bah Paul Nongbri, nongshong shnong katei ka thaiñ, u la pynpaw ba ha kine ki phew snem ba la lah, kum ki nongshong shnong ki la mad shisha ïa ka sohsat ba jur, namar ka jingbym don ïa ka surok kaba biang. Hynrei da ka jingïoh ïa kane ka surok na Umdang sha Nongjaïaw, ka la long shisha ka jingkyrkhu ïa ki paidbah, ha kaba mynta ki la kham pynsting ha ki kit ka bah, ka ïaid ka ieng, khamtam ha ka pang ka shitom namar wat ki kali rit ruh mynta ki la lah ban poi da kaba suk.
Katba na ka liang u bah Fridius Riangjong, uwei na ki nongshong shnong jong katei ka thaiñ, u la ïathuh ba kane ka surok ka dei kaba donkam haduh katta ïa ki paidbah katei ka thaiñ bad ki don haduh phra tylli ki shnong ki ban ïoh myntoi lyngba ka jingshna ïa kane ka surok.
Ki nongshong shnong ki la kyntu jur ruh ïa u Contractor ba u dei ban kham pynsted ïa ka jingpyntrei ïa katei ka surok, khnang ba kan wanrah shisha ïa ka jingmyntoi ïa ki paidbah.
