Ai jingthoh u Bah John ha u MP ban wanrah jingkylla ka Scheduled Tribe ha riti synshar ka Ri

Shillong, Risaw 04: U Bah John Kharshiing u la ai da ka jingthoh sha u MP ka Rajya Sabha u James K Sangma ba un ïakren bad ka sorkar pdeng ban wanrah ïa ka jingpynkylla ïa ka Artikle 338 bad 338A kaba ïadei bad ka Schedule Tribe ha ka riti synshar ka Ri India.
Kane ka dei halor ka jingai jingmut jong ka SC bad ST Commission ha u snem 1997 -1998, ha kaba ki riewlum kila phah ïa ka jingthoh ha u snem 2010, 2012 bad 2015, ba kin leh eiei ha ka por ba biang bad phah ïa ka kaiphod sha ka National Commission for Scheduled Tribes (NCST) ha Parliament bad jingbatai kaei kaba la leh.
Ïa kane ka jingdawa la kyrshan ïa ka National Commission na ka bynta ki Scheduled Castes bad Scheduled Tribes kaba mynshuwa ha ka snem 1997-1998 bad ka ka kaiphod la rah hapoh baroh artylli ki ïing dorbar Parliament bad ban ïoh ïa ka jingmynjur President ka Ri India hapoh 6 bnai ïa kane lah ban leh da kaba pynkylla ïa ka Artikle 338 ka Riti Synshar.
Ha kane ka jingthoh kaba la ai sha u MP Rajya Sabha la kdew ba ka la don ka jingïakren ha u snem 2015 bad Myntri ka sorkar pdeng ba dei peit ïa ka tnad ki rit paid bad shongknor Parliamentary Standing Committee kaba peit ïa ki SC bad ST, hynrei haduh mynta ym pat lah ban pynkylla ïa ka Artikle 338 bad 338A ban buh ïa ka por ban phah ïa ka kaiphod ha Parliament.
U bah John la ong ba kane kam ktah tang ïa ki riewlum ha Meghalaya hynrei ka ktah ïa baroh ki riewlum ha ka Ri India, la kyrpad ïa u MP ba un ïakren ïa kane ka bynta hapoh Parliament ha kaba ïa dei bad kane ka bynta kaba ktah ïa ki riewlum.