Asian Games 2026: Pynkut ka India ha ka kyrdan ba saw da 85 tylli ki takma

JAPAN, Risaw 04: Ka Asian Games 2026 ka la poi kaba kut da ka jingïalang pynhap pyrda kaba iphuh iphieng ha Japan, ba la shim bynta lang da ki nongïalehkai na kylleng ka dewbah Asia ha ka jingpynkut, ha kaba ka Neeru Dhanda kaba la khur ar tylli ki takma ksiar, ka la ïalam ïa ka kynhun India da ka jingsngew sarong ryngkat ka lama lai rong ha kti.
Kane ka jingïalang ka la rakhe ïa ka kolshor jong ki nong Japan lyngba ki jingshad tynrai bad ki jingrwai, ryngkat bad ki jinglehkai pynbyrngia jong ka juk mynta. Ki nongïalehkai jong ki ri bapher bapher ki la ïalum lang shi jaka, ryngkat ka kaweh lama, ban lehkmen ïa ki takma ba ki la ïoh khur bad ban rakhe ïa ka jingpynkut ïa kane ka lympung bah jong ka dewbah Asia.
Kane ka jingïalang ka phaikhmat ruh sha ka Doha 2030, ha kaba la pyndep ïa ka jingaiti ïa ka lama bad ka sharak jong ka Asian Games, na Japan sha Qatar. Ka bynta kaba kyrpang ka la pynpaw ruh ïa ka histori jong kane ka lympung, kynthup ïa ka jingpynkynmaw ba ka Asian Games kaba nyngkong eh la pynlong ha New Delhi ha u snem 1951.
Nangta ka Qatar ka la shim ïa la ka jong ka bynta da ka jingrwai ri jong ka bad ka jingpyni ïa ka Doha, ka nongbah ka ban sa pdiang bad pynlong ïa ka Asian Games ha u snem 2030. La pynkut ïa ka jingïalang da ki jingrwai bad ki jingshad tynrai jong ka Japan.
Na ka bynta ka India, ka kynhun ka la pynkut da kaba khur 85-tylli ki takma baroh, kynthup ïa ka jingjop kaba sah jingkynmaw ha ka jingïalehkai hockey, kriket, ïakop siat khnam bad golf, katba ka ri ka la pyndep ha ka kyrdan ba saw ha ka miej jingkheiñ ha ka jingïalehkai baroh kawei.
Ki 85 tylli ki takma ki kynthup ïa 21 tylli ki ksiar, 27 tylli ki rupa bad 37 tylli ki rnong.
Ka India ka la pyndep ha kajuh ka kyrdan lai snem mynshwa ha Hangzhou, da kaba khur kham bun ki takma, kaba long 106 tylli baroh, kynthup ïa 28 tylli ki takma ksiar.
Ka China ka la pyndep ha khlieh duh da kaba khur 341 tylli ki takma, kynthup ïa 169 tylli ki ksiar. Ka Japan, ka ri ba pynlong ïa ki jingïalehkai ka la pynkut da 269 tylli ki takma, bud sa ka South Korea kaba la khur 150 tylli ki takma.