Lajan dep artad ka jingtei ïa ka Polytechnic ha Nongpoh bad Nongstoin, kumba 65 persen dang ïaid ka Polytechnic ha Gasuapara
Buddien ka Estimate Committee jong ka Iingdorbar ka Jylla ïa ka jingpyntrei
Shillong, Nailur 28 : Ka Estimate Committee jong ka Iing Dorbar Thawain ka Jylla ha ka sngi Nyngkong ka la pynlong ïa ka jingïalang buddien halor ka jingpyntrei ïa ki lai tylli ki Polytechnic kiba dang pyntrei ha ka jylla.
Haba pyntip ïa kane, u Chairman ka Estimate Committee, Bah Mayralborn Syiem u la pyntip ba ha kane ka jingïalang kaba la donlang ruh ki dkhot jong ka Committee kynthup ïa ka Miani D Shira MLA, Bah Shakliar Warjri MLA, Bah Gabriel Wahlang MLA, RG Momin MLA ryngkat ki ophisar sorkar ki la ïoh ruh ban ïatai halor ka mat kaba ïadei bad ka tnad Pule Puthi, halor tnad Ïalehkai kumjuh ruh ha ka Labour Department.
Haba kren bad ki lad pathai khubor, u Bah Mayral u la ïathuh ba ha ka jingïakren kaba nyngkong ki la ïatai haba ïadei bad ki lai tylli ki Polytechnic kiba don ha ka Jylla bad ka tnad Pule Puthi.
U la ïathuh ba ka jingtei ïa kine ki polytechnic ka la ïaid shakhmat kynthup ïa kaba ha Nongkhrah kaba don ha Nongpoh, nangta ka Polytechnic ha Nongstoin bad kaba lai ka dei ka Polytechnic ha Gasuapara ha South Garo Hills.
“Kine ki dei ki lai tylli ki polytechnic kiba la ïoh ïa ka mang tyngka naduh ki snem 2009 da ka Ministry of Human Resources ha kato ka por kaba tip mynta kum ka tnad Pule Puthi,” u la ong.
Shuh shuh u la pyntip ba ka jingtei ka la dep bad kaba sah mynta ka long sa tang ka Administrative Block bad katto katne ki kamra klas jong ki samla pule.
U la ïathuh ba ka jingïalang ka la buddien ïa ka jingïaid jong ka kam baroh bad kumjuh ha ka jinglong ka pisa.
“Ka Polytechnic ha Nongpoh bad ha Nongstoin ka kam ka la ïaid shaid shaid bad la jan dep artad 100 persen ka jingtei shwa ban aiti sha ka tnad. U ong ruh kaba sah mynta kan dei sa tang ka jingpynpoi ïa ka um, ka bording bad kumjuh ka jingpyndap ïa ki kam ba lait ha kitei ki jaka ai jinghikai na bynta ka Nongpoh bad Nongstoin. Ïa kane mynta la phah sha ka tnad Planning bad Finance ban ïoh ïa ka jingmynjur,” u la ïathuh.
Haba ïadei pat bad ka Gasuapara u la pyntip ba ka jingpyntrei ka dang sah bad ka dang poi tang kumba 64-65 persen ei ei. “Kumta ngi la bthah ïa ka tnad ba kan pynstet ïa ka kam katba kloi na bynta ka jingmyntoi jong ki paidbah ba bun,” bynrap biang u Chairman ka Committee.