Shillong, Nailur 24: Ka Meghalaya kan ïakhun pyrshah ïa ka Sports Authority of India ha ka semifinal ba nyngkong jong ka Dr Talimeren Ao National Football Championship na ka bynta ka Junior Girls (Tier 2) 2026-27 ha Narainpur, Chhattisgarh.
Kane ka jingïalehkai kan sdang ha ka por 7:30 baje mynstep ha kane ka sngi Thohdieng.
Ka Meghalaya ka la shah kynthup ha ka Group C kaba don saw tylli ki kynhun hynrei ka Nagaland ka la weng noh ïalade shuwa ban sdang ïa ka jingïakhun, kaba pynsah ïa ka jylla ban ïakhun pyrshah tang ar tylli ki kynhun.
Kane ka kynhun ïalehkai jong ka Meghalaya, ba la ïalam da ka Haphilabet Kharkongor kum ka coach, ka la pynliem ïa ka Jammu & Kashmir bad ïa ka Punjab ban bat da lade ïa ka kyrdan ba ha khlieh duh jong ka Group bad ïohrung sha ka semi final.
Katba ka SAI, ka don ha ka Group A kaba don san tylli ki kynhun. Ki la jop ïa baroh saw tylli ki jingïalehkai group stage, da kaba pynliem 11-0 ïa ka Chandigarh, da 5-1 ïa ka Sikkim, 6-0 ïa ka Tripura bad 5-2 ïa ka Uttarakhand.
