Shong kyllaiñ myngngor ki nongtrei shetja ha ki skul bad dawa pynneh ïa ka PM-POSHAN ha WJHs

Jowai, Nailur 22: Ki nongtrei shet ja sngi ha kylleng ki skul hapoh ka lama jong ka Union of Cook cum Helpers PM POSHAN Meghalaya bad ka All Jaiñtia Midday Meal Worker Association mynta ka sngi 22 tarik u Nailur, 2026 kila ïamih ban shong kyllaiñ mynngor ha stand Ummulong Jowai, ban dawa na u Myntri Rangbah duh ka Ri ban pynneh ïa kane ka skim PM-POSHAN bad ban pynkiew ïaka bai nong kum ka jingai sngewbha (honorarium).
Ïa kane ka jingshong kyllaiñ myngngor ba jai jai la pynlong ha kylleng ki District jong ka jylla mynta ka sngi, kynthuh sha ki bynta ka Garo ka ban long haka 25 tarik u Nailur, 2026 ban dawa jur ïa ka sorkar ban pynurlong ïa kane ka jingdawa kum ki nongtrei shet ja sngi kiba ju im na kane ka kam.
Na ka liang u Adviser ka seng u ma Khroo. L. Pariat ha ka jingkren sha ki lad pathai khubor ha Jowai ula ong kane ka jingshong kyllaiñ myngngor ka long shi bynta na ka jingïakhih sangeh shet jong ki naduh u 1 tarik u Nailur ka ban bteng haduh ka 30 tarik u Nailur, 2026.
“Mynta ka jingïakhih sangeh shet ja jong ki kala jam sha ka 22 sngi, da kaba kyntu ïa u Myntri Rangbah duh ka Ri bad ki Myntri ka sorkar India ban kin bteng ïa kane ka skim kaba la kut ka jingtreikam naduh 31 March 2026, Hynrei na ka liang ka Ministry of Finance naduh u bnai April-September kala bteng kum ka (temporary extension) ba shipor” ula ong.
U ma Pariat ula ong ha ka jinglap jong ki kum ki nongtrei shet ja sngi, kane ka skim kala ïarap shibun eh, kumta ki dawa ba kan bteng bang ïa kane ka skim, haka juh ka por kala dei ban pynkiew ïa ka jingai sngewbha (honorarium) na ka 900 tyngka sha ka 9000 hajar tyngka ha ka shibnai na ka sorkar kmie.
Shuh shuh ula ong kiba bun na ki nongtrei ïa kane ka kam naduh Mizoram, Nagaland, Manipur, Assam ruh ki don ka juh ka jingsngew ban dawa pynneh ïa kane ka skim bad ban pynkiew ïa ka honorarium, u kyrmen skhem ba u myntri rangbah duh ka ri un pyntreikam ïa kane ka jingdawa.
Ula pyntip ruh na ka liang ka sorkar jylla kala dawa na ka sorkar kmie ban pynkiew ïa kane ka jingai sngewbha, lyngba kane ka jingïakhih u kyrmen ka sorkar ka pyntreikam ban bteng ïa ka skim khnang ba ki nongtrei bylla shet ja sngi ha ki skul kiba don kylleng ka Ri kin ïoh kam bad ki khynnah ruh ki poi sha ki skul.