Bymthung ka sorkar 40 ngut ki Nonghikai shem jingeh ki samla pule Fourth Year: MCTA

Shillong, Nailur 20 : Ki College hapoh ka jylla ki la ïakynduh mawsiang ban pynbiang ïa ka jingdonkam ki samla pule kiba la pule ïa ka Fourth Year kat kum ka NEP 2020 namar ba ka sorkar ka khlem pat thung haduh 40 ngut ki Nonghikai ha ki post kiba lait ha kylleng ka jylla, ong u President ka MCTA u S.K Pradhan ha ka Sngi Thohdieng.
“ Ngi lap ba don 488 tylli ki post ba la dep mang, 34 tylli na kitei ki lait kat haduh u Naitung bad halor kane la leit ai da ka dorkhast sha u Myntri ka tnad pule puthi u ma Lahkmen Rymbui hynrei ym shym la leh ei ei bad mynta lei lei ngi tip ba ki don haduh 40 tylli ki post kiba lait” ong u Pradhan.
“ Ka wat ba nyngkong jong ki samla ba la pule Fourth Year ka la sdang bad kane ka la pynkhia ïa ki nonghikai namar la kynton shuh shuh ïa ki Class ha ki. Ka NEHU ka la pynpaw ba la donkam ban pynbun ïa ki nonghikai. ki samla pule ki la mad ïa ki jingeh namar ngim lah shuh ban ai ka jinghikai kaba biang ïa ki” ong biang u Pradhan.
U la ïathuh ba kiba bun ki College kim lah ban ai ka jinghikai ïa ki samla pule Fourth Year wat la dei pynrung ïa ki kat kum ka Fourth Year Undergraduate Programme.
“ Hooid la kular ïa ki na ka bynta ka Saw snem hynrei ki hap ban mih noh na ki college hadien ka snem ba lai. Lada ka sorkar kam thung nonghikai ha kitei ki post ba thylli ngim tip shuh shano ka lawei ki samla pule. Ngim tip shuh kine kiba pyndep tang lai snem ki la biang ne em ban ïoh ïa ka Degree Level examination” ong biang u Pradhan.
Halor ka UGC Scale u Pradhan u la ong ba ki don 69 ngut ki nonghikai ki bym pat ïoh da kane ka scale. “ La thung ïa ki kat kum ka jingbuh kyndon bad jingdonkam ka UGC hynrei ki ïoh pat da ka tulop kat kum ka scale jongka jylla. Hadien ka sorkar ka ai ban jied da ka State ne UGC, kine ki la jied da ka UGC hynrei haduh mynta kim pat ïoh satia. Kane ka la pynduh noh ka jingshaniah ïa ki Nonghikai” ong u Pradhan.
“ Ki nonghikai UGC ki ïoh tang ka basic bad ka DA. Ngi la ïoh 53% ka DA ha u Naitung jong u snem ba la dep, bad 55% yn shym la ïoh satia.
Haba ai ka jingkyrshan ïa ki nonghikai Deficit kiba ïakhih pyrshah ïa ka Structured Pay Framework u Pradhan u la ong “ Kane ka jingleh ka long kaba bakla shi katdei eh bad na kata ka daw haba ki la sngewthuh ki sa weng noh ïa ka ka. Ka jingpynbna ba la pynmih ruh i kumba la pynkhreh da ka tnad Law ym dei da ka tnad pule puthi. Kane hi ka pynpaw ba ha Meghalaya phi donkam ban mih sha surok ban ïoh ïa ki hok jongphi. Ngi dawa namar kata ban thung kam noh ïa ki Nonghikai ha kitei ki post ba lait bad ban pyntreikam noh ïa ka UGC Scale” pynkut u Pradhan.