Dawa ki nongsynshar shnong hima Nongmynsaw ban pynbeit noh ïa u pud u sam

Nongstoiñ, Nailur 20: Ka Synjuk ki Nongsynshar Shnong Hima Nongmynsaw Syiemship, ha ka jingïalang kaba la long ha Langpih ha ka sngi thohdieng 18 tarik Nailur 2026, ka la rai ban buh ïa ka jingdawa na ka Sorkar Meghalaya ban pynsted bad pynkloi noh ban sdang biang ïa ka jingïakren pynbeit pud hapdeng ka Jylla Meghalaya bad Assam.
Ka kyrwoh khubor na ka Synjuk ka ong ba ka sorkar Meghalaya ka la dep thung biang ïa ka Regional Committee halor ka mat ïakren pynbeit pud.Hynrei, haduh mynta kane ka Committee kam shym pat la khot jingïalang wat tang shisien ruh.Kumta ka dawa jur ba kane ka Committee ka dei ban pynkloi noh ban pyndep ïa kane ka kam.
Ka jingïalang ka la rai ba baroh ki nongshong shnong ki dei ban ieng tylli kawei ban ïakhun pyrshah beit ïa ka Sorkar Assam, namar ki jingpyndik ki la long shaba palat kat nang mih ki sngi.
“Ka Synjuk ka la rai lang tang kawei ka sur ba da lei lei ngin ym kohnguh lano lano ruh ïa ka Assam bad ïa ki jingïai wan pynbiej jong ka na ka por sha ka por. Da kawei ka jingïasngewthuh jingmutlang ha ka thaiñ, ngi la rai ba ki Khasi bad Garo kiba shong ha kane ka thaiñ, ngin ïeng tylli lang kawei”, ong ka kyrwoh na u Bah Sandiwel Synchiang President ka Synjuk ki Nongshong shynshar shnong Nongmynsaw.
Shuh shuh u la ong, “Lada ka Assam ka ïai wan pyni bor, ngin ïa ieng lang kawei ban pyrshah la ka dei ha ki Shnong ba shong ki Garo ne ki Shnong ba shong ki Khasi ruh. Ha kaba ïadei bad ka Census bad ka SIR ngin ym pdiang shuh na ka Assam”, “Ki paidbah ka thaiñ ki ju shah pyndik ha ka Assam ha kiba bun ki liang kumba ka dang shu dep jia shen ha kine ki khyndiat sngi. Ka jingpynthud na ka Assam ïa ka jingpyntrei ïa ka Aganwadi Centre ha Noapara, ka Health Sub Centre ha Kompaduli. Nangta ka jingshah pynthud ïa ki paidbah nongshong Shnong ha Borkhuli haba ki mut ban pyntrei ïa ka scheme rep ba ki ïoh na ka Jylla Meghalaya, ki dei kiba ngim lah shah shuh shisha”, ong u Bah Serbilin Lyngdoh Secretary Synjuk ki Nongshong Synshar Shnong Nongmynsaw.
U la ong ruh, “Ka Sorkar Meghalaya ka dei ban ai jingïada ïa ki paidbah bad ka dei ban pynbun shuh shuh ïa ka jingdon ki pulit ha Langpih Police Outpost, ha Lejadubi Police Outpost ha Kyrshai Border Outpost, ha Umwali Border Outpost bad pynkloi noh ban buh ïa ka Police Camp ha Noapara”.
Shuh shuh la ong ruh, “Ka Sorkar Meghalaya ka la shah pynthud ïa ka jingpyntrei ïa ki bun tylli ki scheme ha ki thaiñ khappud ha ka Sorkar Assam. Hynrei, ka Assam ka ju trei laitluid khlem don ba pynthud ïa kino kino ki project.Kane ka pyni ïa ka jingshah ñion beiñ jong ka Sorkar Meghalaya ha ka Assam”.
“Ngi dawa ba ka Sorkar kan phah sdang noh biang ïa ki jingpyntrei ïa ki Project ha ka thaiñ kum ka Health Sub-Centre ha Kompaduli bad ka Aganwadi Centre ha Noapara. Lada ki Contractor kiba trei ïa kine ki project kim nud, ki dei ban ailad ha ki paidbah nongshong shnong ban trei hi ïa kine ki scheme baroh, namar ki trai shnong ki nud beit ban trei ïa kine bad ban ïakhun bad ka Assam ruh”.
“Lada ka Sorkar Meghalaya kam lah ban pynurlong ban bteng beit ban trei ïa kitei ki project, na ka liang ki Nongsynshar Shnong kin khang noh ïa ka Assam ban wan trei ïa ki Developement Programme ha ka thaiñ”, pynkut ka kywroh.