Shillong, Naitung, 29: Ka Ministry of Roads Transports and Highways jong ka Sorkar Pdeng ka la mang pisa T.8.7 klur na ka bynta ban shna ïa ka surok Shillong-Tura kaba twa ha u snem 2020 ha ka shnong Nongshram kaba dang hap hapoh u pud u sam jong ka West Khasi Hills District.
U Chief Engineer, National Highway u G K Marak u la ong ba ka tnad PWD (National Highway) ka ladep ban khot ïa ka Tender na ka bynta ban pyntrei ïa kane ka surok kaba la twa ha Nongshram kaba hap hapoh jong ka Mawthyngkut Constituency.
Ka jingkhot Tender kan kut ha ka sngi ba ar jong kane ka taiew ban wan lada kam don kano kano ka jingthud ha ki Tender bad ïa ka jingtrei yn sa lah ban aiti noh na ka bynta ban sdang trei hapoh shibnai.
Kane ka jingmang pisa kam dei tang na ka bynta ban shna ïa kane ka surok kaba twa hynrei kan kynthup ruh naduh kaba shna ïa ka nala bad ki kynroh.
Lah ban pynkynmaw ba kane ka surok ka la twa ha u snem 2020 na ka daw ka jingther jong u lapbah uba jur.
Namarba ka dei ka surok National Highway kumta ka Sorkar Jylla ka la thoh sha ka Ministry of Roads Transports and Highways ban bei pisa bad ha u Lber, 2022 la mang ïa ka pisa.
Kum ban shu pynkynmaw hangne, bun tylli ki surok State Highway ha kylleng ka jylla ki la shah pynjulor na ka jingtwa khyndew hadien ka jingther jong u lapbah uba jur ha ki bnai baladep.
Ki don ruh ki surok kiba la dkut khamtam ha ka thaiñ Maheshkhola ka shnong kaba don ha khappud ka Ranikor bad Bangladesh ha kaba ki paidbah ki la ïakynduh mawsiang ha ka leit ka wan bad ban pynpoi ïa ki marbam mardih.
