Rakhe ka Star Cement ïa ka jingdap 76 snem u PM Modi da kaba ai snam bad thung dieng

By Mawphor Editor Last updated Sep 19, 2026

Khliehriat nailur 18: Shibynta ka jingrakhe ïa ka jingdap 76 snem jong u Myntri Rangbahduh ka Ri u Narendra Modi, ka Department jong ka CSR, Star Cement, Lumshnong Unit myn ha ka 17 tarik Nailur ka la pynlong da ka prokram ai snam mon sngewbha ne ‘Blood Donation Camp bad la pynlong ruh ïa ka jingthung dieng.
Kumba ju long, tnat CSR Star Cement ka la pynlong ïa ka Blood Donation Camp ha ryngkat ka jingiatreilang bad ka Jowai Blood Bank, West Jaiñtia Hills District, kane ka don ka jingthmu ban noh synniang ïa ka snam na ka bynta ki nongpang kiba donkam kyrkieh ïa ka snam bad ruh ban kyntiew ïa ka jingpynsngewthuh paidbah halor ka jingdonkam ban noh syniang ïa ka snam da ka mon sngewbha.
Ha kane ka prokram ki la don baroh haduh 40 ngut ki nongtrei jong ka company Star Cement kiba mih shakhmat bad noh synniang ïa ka snam da la ka mon sngewbha bad ïa ka kynhun kaba na ka Jowai Blood Bank la lam khmat da ka Dr. Ibansara Khyriem, kaba dei ka Medical & Health Officer, Jowai Civil Hospital Blood Bank.
Ha kane ka prokram ka la don ruh ka jingiamir jingmut hapdeng ki doktor bad kiba ai snam mon sngewbha ha kaba ki la pynpaw ruh ïa ka jingkongsan kaba ïadei bad ka jingai snam mon sngewbha, ka Dr Ibansara Khyriem ka la ai ka jingkhublei ïa ka company Star Cement kaba la iai bteng shuh shuh ïa kane ka prokram ai snam sha ka Blood Bank namar kane kan long ka jingkyrkhu bad kan iarap shikatdei eh ïa ki nongpang kiba donkam kyrkieh ïa ka snam ba kynthup ruh kito ki longkmie kiba kha khyllung kiba donkam ban ai snam.
U Lokesh Kumar Bahety uba dei u Unit Head jong ka Star Cement, Lumshnong u la ong ba ka Star Cement lyngba ka tnat CSR ka la bteng bad nang ïai bteng shuh shuh ban kyrshan ïa ki nongshong shnong jong ka thaiñ da kaba pynlong bad da ka jingiashim bynta ha kane ka jingai snam kaba da ka mon sngewbha bad kaba kum kane ka prokram ne ka camp ka la ïai mynta la bun tylli ki snem.
Kumjuh ruh na ka liang u Management Representative jong ka Star Cement, u Devender.K.Bansal, u la ong ba ïa ka jingnoh syniang ïa ka snam ne ka Blood Donation camp ka tnat CSR ka ju pynlong haduh ar sien bad lai sien ha ka shi snem bad ka kynhun kaba na ka Blood Bank Jowai ka ju wan ban pyniaid ïa kane ka Blood donation “Ka snam ka dei kaei kaei kaba ym lah ban shna hi bad ka dei ka bynta kaba kongsan bha ban leh ïa kane ka jingai snam ei, shuh shuh haba ai snam ka iarap shibun ïa ka koit ka khiah jong u ba ai snam, ngi sngew kmen bad da ka mynsiem kaba sngew kmen ngi la leh ïa kane ka Blood donation camp kum shibynta ban iarap ïa ki briew kiba donkam snam” ong u Devender.K.Bansal.
Haba kren pat halor ka jingthung dieng, u Bansal u la ong ba ka company ka la kyrpad ïa uwe na ki heh sorkar, u Scientist E, Additional Director, Ministry of Environment, Forest and Climate Change, Shillong (MoEF) u bah H.Tyngsong ban ïa don lang bad u la wan ban long kum u kongsan ha ka prokram thung dieng ba la pynlong da ka Star Cement bad ha kane ka prokram la lah ban thung haduh shi hajar tylli ki tynrai deing bad ruh ha kane ka sngi ka dei ruh ka sngikha u Mynri Rangbah ka ri, u Narendra Modi, kumta ka company ka la rakhe da kaba pynlong ïa kine ki ar tylli ki prokram bad la ong ruh ba yn nang ïai pynlong ïa kiba kum kine ki prokram bad kiwei kiwei ki prokram ha ka thaiñ bad yn nang theh ruh ki jingiarap ban kyrshan lang ïa ki nongshong shnong ka thaiñ ha ka imlang ka sahlang.
Ha kane ka prokram la wan iashim bynta da palat 100 ngut ki dkhot jong ka kynhun kiba la thung haduh palat 1000 tylli ki tynrai dieng ha ka jingiadon lang u Lokesh Kumar Bahety, u Devendrer Bansal, Management Representative bad u Ramakuru Venkata Kishore, HR & Admin Head.