Jowai, Nailur 18: Ka Mynsngat Ryntih, Mukhla Nongrim bad ka Thadmusem SC ki la jop ïa la ki jong ki jingïalehkai ha ka lympung phutbol (L) Joybell Suiam Memorial jong ka kyrdan 2nd Division Football League 2026 bala pynïaid da ka Thadlaskieñ Sport Association, ba la long hynne ka sngi Thohdieng (18 tarik u Nailur, 2026) ha madan Wahiajer Multi Sports Complex Stadium.
Ka Mynsngat Ryntih kala pynliem da tang 1-0 ïaka Momer FC, bad ïa kane ka kol la thep da u Rimaiki Mynsong (17’).
Nangta ha ka jingïakhun kaba ar, ka Mukhla Nongrim kala jop da 3-2 pyrshah ïa ka Madansynrang FC. Ka Mukhla Nongrim ka la thep ïa kine ki lai kol lyngba u Aimonmi Sumer (11’), u Lenis Sumer (20’) bad u Deihok Suna (28’). Katba u Daio Shadap (15’) bad u Prejest Muktieh (59’) ki la thep na ka bynta ka Madansynrang FC.
Katba ka jingïakhun ba khatduh, la sakhi ïa ka Thadmusem SC kaba la pynjemkhnap da 7-0 kol ïa ka Iawpynsin Wahiajer, ha kaba u Samuel Shadap (10, 49 & 57’) u la thep hat trick, u Samson Nongrum (41’), u Kermi Dkhar (47’), u Buda Rani (50’) bad u Iashaniah Synnah (69’).
Ki jingïalehkai ha kane ka sngi Saitjaiñ; Por 9 baje mynstep ka Maskut pyrshah ïaka Maitchaphrang FC; Por 11 baje mynstep ka Niriang Pdienlum pyrshah ïaka Laru SC.
