Yn ïakren bad ka sorkar Assam lada ka jinglum khanasamari ha Langpih ka long kaba shisha: Myntri Rangbah

Shillong, Nailur 17 : U Myntri Rangbah ka Meghalaya, u Conrad K Sangma, u la ong ba ka sorkar jylla ka la tip shaphang ka jingkynnoh ba ki ophisar na Assam ki la wan leh khanasamari ha Langpih.
U la ong ba ïa kane ka mat la pyntip sha ka sorkar bad lada ka long kaba donkam, yn ïakren bad ka sorkar Assam.
“Ym pat ïakren ïa kane ha ka kyrdan jong nga, hynrei nga tip shaphang kane ka mat. Ka Political Department ka dang peit bniah ïa kane bad ngi la pyntip ruh sha u Commissioner,” u Sangma u la ong.
U la ong ruh ba ka sorkar ka dang ïakren bad ki ophisar ha ka thaiñ Langpih bad lada paidbah ki mad kano kano ka jingeh ne kim sngewtynnad, ka sorkar kan leh eiei.
“Lada ka long ka jingjia kaba shisha bad ki briew jong ngi kim sngew suk, ngin ïakren bad ka sorkar Assam ban pynthikna ba ïa ka jingeh yn lah ban pynbeit,” u la bynrap.
Haba kren shaphang ka kylla baar jong ka jingïakren pynbeit pud u Myntri Rangbah u la ong ba yn sa thaw noh ïa ka Border Committee kham kloi, bad hadien kata kan sdang ïa ka kam jong ka.