Yn pynmih biang ka DHS ïa ka thup kyrteng ki samla pule MBBS, BDS hadien ba ujor ka JSU ïa ka jingbakla

By Mawphor Editor On Sep 15, 2026

Shillong, Nailur 14 : Ka Directorate of Health Services (DHS) kan pynmih bïang lashai ïa ka thup kyrteng jong ki samla pule MBBS bad BDS 2026-27, hadien ba ka la weng noh ïa ka thup kaba la pynmih nyngkong.
Kane ka la mih hadien ba ka Jaintia Students’ Union (JSU) ka la pynpaw ïa ka jingbym ïahap ha ka jingbhah jaka pule, khamtam ha kaba ïadei bad ka merit.
Katkum ka kyrwoh, la ong ba na ka liang ka Director of Health Services, ka Dr L Mylliem Umlong, ka la ai ïa kane ka jingkular ha ka jingïakynduh bad ka kynhun jong ka JSU ha kane ka sngi Nyngkong hapoh ka jingialam jong u Education Secretary, samla Bocheru Mi Pohsnem.
Ka JSU ka la kynnoh ba don ki samla pule kiba ïoh marks NEET kiba kham duna hynrei ki la ïoh jaka ha ki college kiba paw, kum ka NEIGRIHMS, katba kiwei pat kiba ïoh marks kham bun bad kiba la jied ïa kajuh ka college kim shym ïoh jaka.
Ka seng ka la ai nuksa ba uwei u kyrtong uba don ha Serial No. 30 bad uba ïoh 439 marks u la ïoh jaka ha NEIGRIHMS, katba don kiwei kiba ïoh marks kham bun bad kiba la jied ïa NEIGRIHMS hynrei kim ïoh jaka.
Ka JSU ka la ong ba kane ka pynmih jingkylli halor ka rukom pyndonkam ïa ka merit ha ka jingai jaka pule.
Ka seng ka la rah ruh ïa ka mat halor ka Standard Operating Procedure (SOP). Ka JSU ka la ong ba ka SOP kaba thymmai kaba ka tnad ka la mynjur kam pat shym la pynbna paidbah.
Ka Seng ha ka kyrwoh ka ong ba na ka liang ka tnad ka la kyrpad ïa ki samla pule kiba shem ïa kino kino ki jingbakla ha ka jingbhah jaka ban phah ïa ki jingujor lyngba ka email dmeshillong@gmail.com.
Ki samla pule ki lah ban phah ïa ki jingujor haduh 10 baje mynmiet, khnang ba ka tnad kan lah ban peit ïa ki shwa ban pynbeit ïa ka thup kyrteng, ong ka kyrwoh..
Ka JSU ka la ong ba kan dang buddien ïa kane ka kam haduh ba ka jingbhah jaka pule kan long kaba hok bad kaba shai.
Ka seng ka la ong ba ka jingdawa jong ka ka long ba ka bhah ka dei ban bud ïa ka merit, ban burom ïa ka college kaba ki samla pule ki la jied, bad ban bud ïa ka SOP kaba la pynbna paidbah.