Hiar jurip ki bor Distrik, NHIDCL, NHAI bad MCTODA naduh Jorabat haduh Umdihar ban wad ka jaka ba biang

Nongpoh, Nailur 14: Hadien ka jingud jingnam jong ka kynhun ki trai bad ki nongñiah trok hapoh ka lama ka Meghalaya Commercial Truck Owners and Drivers Association (MCTODA) kiba la leit ruh ban ai da ka jingthoh sha u Deputy Commissioner dang shen, bad hadien ka jingïalang kaba lum dang shen, naka liang ki bor district mynta ka sngi kila pynlong ka jingjurip lang hapdeng ka bor district, ki nongmihkhmat ka NHIDCL, NHAI bad MCTODA ha shilynter u surok National Highway 6 naduh Jorabat ter ter haduh Umdihar.
Kum ban shu kdew hangne ba ki nongñiah trok ki dap da ka jingsngewsih kaba khraw tang shu rung ha Ri-Bhoi namar ka jingpynjari ïaki kyndon ban nym shah ban ieng kali harud surok naka bynta ka jingshngaiñ ki paidbah ba leit ba wan, bad teng teng wat hapdeng ka jingpang jingshitom, ka jingthaid jingjrem ka met ki hap ban ïaid beit bad lada ieng kulmar ki ngat haka kuna ryngkat ka jingshah tied shah bom haki pulit, kumta ki nongïalam kila pynpaw ba kane ka dei ka kam iap kam im ka bym lah shuh ban ap.
Ha kane ka jingleit jurip naka liang ki nongïalam ka MCTODA kila pyrshang katba lah ban pynbor ïaki briew ka NHAI bad bor district ban buh ïaka jaka ieng kali shakhmat ka toll gate jong ka NHAI kaba don ha Pahammawleiñ ka liang ban hiar sha Guwahati, ym sha ka liang Assam hynrei ka dei beit ban long haka jaka jong ka jylla Meghalaya.
Haba kren sha ki lad pathai khubor naka liang u Bah Mosklandar Marngar Chairman ka MCTODA u la ong ki nongñiah trok ki mad jingeh ha bun ki district jong ka jylla hynrei kaba kam jynjar bad mad jingeh tam ka dei ha Ri-Bhoi District bad kum ka kynhun ka ai khublei ïaka bor district ka Ri-Bhoi kaba la shimkhia hadien ka jingud jingnam jong ka kynhun, mynta ka sngi kila pynlong ka jingjurip lang, bad ha kane ka jingjurip naduh Jorabad, kila kdew bad pyni ïaki jaka bad don ki jaka ba kila ai daw ba ki don ki lum kiba heh, bad kum ka kynhun kala pynpaw ba kane baroh ka dei ka kam jong ka NHAI, NHIDCL bad ka sorkar hynrei ka jingangnud jong ka kynhun ka long ban nym pynslem shuh bad kim kwah bay n shong jingïalang da ki phew phew sien bad ruh ban jurip bunsien namar kane ka dei ka kam iap kam im.
“Leh katba ka sorkar ka leh, hynrei ka jingkwah jong ngi ka long ban don noh ka jaka ieng ki trok, ym dei shuh ban dang shim por” la ong u Bah Marngar da kaba bynrap ruh ba ka naka liang ka kynhun kila kren shai ruh wat ban tyrwa jingïarap lem sha ka sorkar, namar kane kala dei ka kutlad ïaki nongñiah trok bad ym don por shuh namar ka aiñ kam shah shuh ban ieng ïaki trok harud surok bad kane kala pynjynjar bad pynsohsat ïaki nongñiah kali.
Shuh shuh u la ong ruh ha katei ka jingjurip kila don ki jaka kiba la klun da ki bar jylla ban buh ïaki karkhana haka thaiñ Umpher Byrnihat kaba dei kawei naki jaka ba biang bad naka liang ki ophisar katno sien kila pyrshang ban pynpra noh namar kadei ka jaka kaba dang hap hapoh u pud u sam ka NHAI, hynrei ynda la mut ban pynpra kala mih ka jingbthah kaba nangno nangno ban ai por shuwa na kawei ka por sha kawei pat, katba ïaki nongñiah trok kam ju don ka jingai por namar tang shu bakla tiak la shah daiñ kuna la shah rah sha thanad bad wat ban poi shaduh iingbishar, katba ïa kita kiba klun jaka pat ka don ka jingleh shilliang.
U Bah Marngar u la ong ruh ba ha kane ka jingjurip kum ka kynhun ka kwah beit ba ka jaka ieng ki trok kan long beit shakhmat ka Toll Gate jong ka NHAI kaba don ha Pahammawleiñ ym sha ka liang Assam kumba la kdew ha kane ka sngi, namar ki mar kiba bun hi ki dei ki ban pynhap sha Assam bad lada ki kali kim poi haka por ba pynlait ïaka No Entry shisien bala jam ïaka toll gate shaei shuh ki kali kin ieng bad kin phai bad lada shah beh hap rung biang sa shisien ïaka toll gate bad ngat ban siew haduh 4 sien shisien leit bad kumta ka bynta kaba biang eh ka dei beit sha ka liang ka surok jong ka Meghalaya naka bynta ka jingshngaiñ jong ki nongñiah ym sha Assam, namar katkum ka aiñ ka lay-by ka dei ban don baroh arliang jong u surok, u la bynrap.