Sngew heh mynsiem u Dr. Jemino Mawthoh ba thmu wan pynïasoh BJP haduh 8 ngut ki MLA ka UDP

Shillong, Nailur 13 : U nongïalam barim ka UDP, Bah Jemino Mawthoh, u la ïada ïa u President ka UDP, Bah Metbah Lyngdoh, halor ki khubor ba don phra ngut ki MLA ka UDP kiba kwah ban rung sha ka BJP namar ka jingbym lah jong ka jingïalam.
U Bah Jemino, uba la rung sha ka BJP ha ka Sngi Saitjaiñ, u la ong ba ka UDP ka la nang khlaiñ hapoh ka jingïalam u Bah Metbah.
“U Bah Metbah Lyngdoh u dei u briew uba ngi burom bha. Nga la trei lang bad u kum u General Secretary bad ngi don ka jingïadei kaba jan bha. Ha ka por jong ka jingïalam jong u bad haba nga dang long General Secretary, ka UDP ka la kiew na ka 6 ngut ki MLA sha ka 12 ngut, bad ka la jop ha baroh saw tylli ki bye-election,” u la ong.
U Bah Jemino u la ong ruh ba kam dei kaba dei ban ong ba ka jingeh ka UDP ka dei namar ka kam nongïalam.
“Kumno ngin ong ba ka dei namar ka kam nongïalam? U la pyrshang katba lah ban pynïatylli bad pynneh ïa ka seng. Ka jingsngewsih ne ka jingbym hun kan don ha kano kano ka seng saiñpyrthei namar ka rukom treikam jong ka saiñpyrthei,” u la ong.
Haba kylli lada ki MLA ka UDP kim sngewhun , u Bah Jemino u la ong ba um pat ïakren bad ki, hynrei u sngewbha lada kin wan sha ka BJP.
“Ngam pat ïakren bad ki, kumta ngam tip lada ki sngewkmen ne kim sngewhun. Nga la ïohi ha ki kot khubor ba ki don ka jingmut ban rung sha ka BJP bad ki dei ban don la ki jong ki daw. Nga hi nga la rai ban rung sha ka BJP naduh u snem ba la dep. Lada ki wan, kan long kaba kham bha,” u la ong.
U Bah Jemino u la ong ba ka jingïohi paidbah ïa ka BJP ha Meghalaya ka dang kylla bad u ngeit ba ka BJP kan nang kiew ha ka elekshon 2028.
“Lada phi peit ïa ka saiñpyrthei ha Meghalaya, ka rukom jinglong ka dang kylla bad ka jingmut jong ki paidbah ïa ka BJP ruh ka dang kylla. Mynta ngi don tang ar ngut ki MLA, hynrei mano ban tip bangin nang bun shuh shuh ha u snem 2028? Ka NPP ruh ka la ju don tang ar ngut ki MLA mynshwa, hynrei mynta ka don palat 20 ngut. Ngi ruh ngi lah ban ïoh ïa ka jingkyrshan jong ki paidbah,” u la ong.
Haba kylli kaei kaba bakla ha ka UDP, u Bah Jemino u la ong ba ym don eiei kaba bakla ha ka seng.
“Ym don eiei kaba bakla ha ka UDP. Nga la ïoh por kaba biang bha ha kata ka seng. Nga la long Working President la ar snem, General Secretary la khyndai snem bad MLA la san snem. Ngi la pyrshang katba lah ban pynïatylli ïa ki bor saiñpyrthei riewlum, hynrei ngim lah ban pynurlong ïa kata. Nga la sngew ba kata ka lynti kam shym la ïaid shakhmat,” u la ong.
U la ong ruh ba ka jinglong jong ka saiñpyrthei ha Meghalaya ka dang kylla, namar ki nongïalam riewlum mynta ki kham sngewtynnad ban leit sha ki seng saiñpyrthei kiba don ha ka ri baroh kawei.
“Ka jingkylla ka la sdang lypa. Ki nongïalam riewlum mynta ki kham sngewtynnad ban leit sha ki seng national. Nga ym don eiei pyrshah ïa ka UDP. Nga la mih noh da ka jingsuk. Ki la kwah ruh ban pynlong ïa ka jingïalang ban leh burom ïa nga. Ym don ka jingbitar ne ka jingïapher jingmut kaba jur,” u la ong.
Haba kren halor ka daw balei ba ki MLA ka UDP kim hun, u Bah Jemino u la ong ba ka lah ban ïadei bad ka rukom treikam jong ka sorkar MDA.
“Ka UDP ka dei ka bynta jong ka sorkar MDA. Katkum kaba nga la ïohsngew na kine bad kito, ka jingbymhun ka lah ban long namar kim lah ban leh ïa ki kam katkum kaei kaba ki la khmih lynti. Ka lah ruh ban long kawei ka rukom ban pyni ïa ka jinglong jong ki, bad ban ong ïa ka sorkar ba ka dei ban burom ïa ki MLA ha ki constituency jong ki,” u la ong.
“Ngam pat ïakren bad ki hi, hynrei katkum ki khubor kiba nga la ïohsngew, nga mut ba kane ka lah ban long ka daw,” u la bynrap.