Nongstoiñ, Nailur 13: U bah Gabriel Wahlang MLA ka Nongstoiñ Constituency u la pynshlur ïa ki samla jong ka thaiñ Nongstoiñ baroh kawei, ba ka pule puthi hi ka dei ka daw bad ka thong ka jingangnud ba ka Nongstoiñ ka dei ban don ne ïoh, namar kane kam dei shuh ka juh jong ka Wait ka Stieh hynrei jong u Khulom.
Na ka bynta kane, u MLA lyngba ka 2nd MLA Excellence Award 2026, ha ka sngi saitjaiñ u la don ryngkat ruh bad ki samla kumjuh ruh ki heprit kum shibynta ban plie ïa ka rynsan jingïakop, kaba ïadei bad ka dro dur, jingïakop mareh marathon bad kiwei kiwei ïa kaba la pynlong ha dorbar Hall New Nongstoiñ.
Ha kane ka sngi la sdang ïa ka jingpynmareh Marathon naduh ka por 5 baje mynstep. Hadien kata naduh ka por 11 baje mynstep la ïoh ban plie pyrda pat sa ïa ka jingïakop dro dur bad ka jingïakop thoh Essay.
Ha ka jingïakop mareh Marathon la don da ki spah ngut ki samla jong ka thaiñ kiba la wan ban ïashimbynta shitrhem, kynthup naduh ki heprit kiba hapoh ka 12 snem ka karta shynrang bad kynthei, kiba hajrong ka 12 snem ka karta ter ter haduh ki samla bad kiwei kiwei. Katba ha ka jingïakop dro dur bad ka jingïakop thoh Essay la pdiang laitluid ïa baroh.
Na ka liang u MLA u la ong ba ïa ki khusnam sha ki nongjop ha ki kyrdan bapher bapher jong kitei ki jingïakop yn sam ha ka 17 tarik u Nailur 2026, ha kaba ha katei ka sngi yn ai khusnam ruh sha ki samla kiba la wan shakhmat ha ki jingpule lyngba ki kyrdan bapher bapher.
U la pyntip ruh ba ka phang pdeng kaba la buh ban phah thoh ïa ka Essay ka dei ‘Ka jingïohi jngai jong nga na ka bynta ban kyntiew ïa ka Nongstoiñ ha ki lïang baroh’.
Na ka liang u MLA u kyrmen ba lyngba kane ka jingpyrshang, yn lah ban kyrshan bad ai mynsiem ïa ki samla ba kin nang san khamtam eh ha kaba ïadei bad ka pule puthi. U la ong ba ka phang pdeng hi ka long kaba shai ban kyntiew ïa ki samla ha ki jingnang jingtip bad jingshemphang, na ka bynta ka lawei ba phyrnai jong ka thaiñ Nongstoiñ.
