Bun ki mat iatai ki Principal ha ka Biennial Conference of Meghalaya College Principal Council

Shillong, Nailur 13 : Ka jingïakynduh lang ka (Biennial Conference) jong ki Principal jong ki College bapher bapher ha ka Jylla hapoh ka lama jong ka Meghalaya College Principals’ Council (MCPC) ka la long ha ka 11 tarik u Nailur 2026 ha St. Anthony’s College, Shillong.
Ha kane ka jingïalang, ki Principal bad ki dkhot jong ka MCPC na ki college bapher bapher ka jylla ki la wan ban ïashim bynta ban ïa kren bad ïa bishar bniah halor ki mat kiba ïadei bad ka kam hikai, ka jingpynïaid kam bad kiwei ki jingeh jong ki college bad ka pule puthi ha Meghalaya.
Ha ka technical session, la ïa kren halor bun ki mat kiba ïadei bad ki eksamin kiba pynlong da North-Eastern Hill University (NEHU), ki kam jingïadei bad ka jingpynïasoh dkhot (affiliation), ka jingpynrung ïa ka snem pule kaba saw ha ka Four-Year Undergraduate Programme (FYUGP), ki jingeh kiba ïadei bad ka curriculum bad syllabus, bad kumno ban pyntreikam ïa ki programme internship.
Ka Council ka la ïa kren ruh ïa bun ki mat kiba la thmu ban buh ha khmat ka Sorkar. Kine ki kynthup ban seng ïa ki CUET centre ha baroh ki District Headquarter, ban pyntreikam bha ïa ka CPF kaba thymmai na ka bynta ki staff jong ki deficit college, ban ai ïa ka UGC Pay Scale ïa ki nonghikai jong baroh ki Government-aided college, kynthup ïa ki People’s College bad Adhoc College. Nangta ban pynneh ïa ki post ba la sanction lypa hapoh ka UGC scale ha ki college bad ruh ban pynneh ïa ki UGC-sanctioned posts ha ki deficit colleges kiba la kylla long ki People’s Colleges.
Ka conference ka la pynpaw ïa ka jingkhuslai kaba jur halor ka jingthmu jong ka Sorkar ban pynduh ïa ka UGC Scale of Pay, da kaba ong ba kane ka lah ban ktah bha ïa ka pule puthi kaba paka ha Meghalaya.
Ka MCPC ka la ong ruh ba ka UGC Career Advancement Scheme (CAS) ka la ïarap ïa ki nonghikai ban trei shitom bad ban ïaleh na ka bynta ka jingkiew ha ka kam, katkum ki kyndon jong ka scheme. Kane ka ïarap ruh ïa ki nonghikai ban kyntiew ïa ka jingnang jingstad bad ban pynneh ïa ka kyrdan jong ka jinghikai kaban long ryngkat lem bad kiwei pat ki nonghikai college ha kiwei pat ki bynta jong ka ri.
Ka conference ka la kyntu ruh ïa ka Sorkar ban ai ïa ka jingkyrshan kaba shisien ai (one-time financial assistance) sha ki college na ka bynta ban pynbha bad kyntiew ïa ki jingtei bad ki jingdonkam. Ka la kyntu ruh ban ai ki recurring grants ban kyrshan ïa ka jingthung nonghikai na ka bynta ki Vocational Training Course bapher bapher.
La ïa kren ruh halor ka jingpynslem ha ka jingpynkhreh ban thung kam bad ban pynkiew kyrdan ïa ki nonghikai bad staff jong ki college.
Ka conference ka la pynskhem ïa ki nongkitkam bad ki dkhot Executive jong ka MCPC na ka bynta sa kawei pat ka samoi. Ïa ka Council yn ïalam da ka Dr Eureka FP Lyngdoh kum ka President, Dr. KK Nongsiej kum Vice-President, Dr. RM Manih kum General Secretary, Dr. S. Khongwir kum Joint Secretary bad Dr. Ratnadeep Roy kum u Treasurer
Ka Executive Committee kan don ruh 13 ngut ki dkhot kiba mihkhmat ïa ki college bapher bapher ha baroh kawei ka jylla.
Ka conference ka la rai ban nang pynkhlaiñ ïa ka MCPC kum kawei ka rynsan kaba pynïasoh ïa ki Principal bad ki khlieh jong ki college ha Meghalaya. Ka la pynpaw ïa ka jingdonkam ban don ka jingïatreilang kaba kham bha bad ban ïa mihkhmat lang halor ki mat kiba ïadei bad ka jingbha, ka roi ka par bad ka jingpynïaid kaba paka na bynta ban kyntiew kham shajrong ïa ka pule puthi ha ka jylla.
Ka Council ka la rai ruh ban ïakren bad ki khlieh jong ki college bapher bapher bad ban kyntu ïa ki ban ïashim bynta kham bun ha kaba pynbeit ïa ki mat kiba ïadei lang bad baroh.
Hadien kane, ha ka prokram la wan ban donlang ruh u Vijay Kumar Mantri, IAS, Commissioner & Secretary, Education Department ka sorkar jylla kum u Kongsan. Ha ka jingkren u la kubur ïa ki jingsngewkhia kiba ka Council ka la pynpaw bad u la kular ha ka jingïalang ba ka Sorkar kan peit bniah ïa ki mat kiba la buh ha ka dorkhas.
Ka Biennial Conference ka la ai ïa ka lad ïa ki Principal bad ki nongmihkhmat na ki college bapher bapher ha Meghalaya ban ïa kren halor ki jingeh kiba kongsan ha ka liang ka kam hikai, ka jingpynïaid kam bad ka roi ka par.
Ki jingïakren ha kane ka conference ki pyni ïa ka jingkut jingmut jong ka Council ban pynjanai shuh shuh ïa ka pule puthi bad ban kyntiew shajrong ha ka jylla bad ban ïatreilang kham bha na ka bynta ban kyntiew shuh shuh ïa ka pule puthi kaba kiew arted ha ka jylla baroh kawei.