Dang sngap jar jar ka sorkar halor ki song jingïarap na bynta ki jingjular shlei um

Shillong, Naitung 28 : Ka sorkar haduh mynta kam pat mang ne pyllait pisa ei ei na ka bynta ban maramot biang ïa ki jingjulor baroh kiba la shah syllad ha ka jingtwa khyndew bad ki jingshlei um kiba la jia ha ka jylla ha kine ki khyndiat taiew ba la dep.
Haba pyntip ïa kane, u Symbud Myntri Rangbah ka jylla, Bah Prestone Tynsong u la ong ba ka sorkar jylla ka la dep ban phah ïa ka jingpyntip sha ka sorkar pdeng haba ïadei bad kitei ki jingdonkam baroh bad mynta ki ap satang ka jingmang pisa.
Shuh shuh u la pyntip ruh ba ka kynhun na ka sorkar pdeng ba la phah da ka Ministry of Home Affairs ruh ka la dep ban wan jurip ïa ki jaka kiba la shah ktah ha katei ka jingshlei um bad twa khyndew ha kylleng ki bynta jong ka jylla.
“Kumta, sa shisien ka Committee hapoh ka jingpeit jong u Myntri Kampohiing ka Ri, u Amit Shah kin sa shong biang bad kin sa shim ïa ka rai katno ka song jingïarap kin ai sha ka Meghalaya,” pyntip biang u Bah Prestone.
Dang shen ka sorkar jylla ka la antad ba ki jingjulor kiba ka sorkar jylla ka la mad na ka jingshlei um ad ka jingtwa khyndew ka la kynjoh sha ka 300 klur tyngka ei ei.
Na ka liang u Myntri Rangbah, Conrad K Sangma ruh hadien ba u la wan ban jurip kylleng kylleng u la pynpaw ba ka jingjulor kadei kaba la jur bha bad ba ka jylla ka donkam kham bun ka pisa na ka bynta ban maramot biang bun ki lynti syngkien bad ruh ki jingkieng kiba la shah syllad bad shah rong lut ha ka umbah na ka daw ka jingther ba khlem sangeh jong u lapbah.