Shillong, Nailur 11 : U Myntri Rangbah ka Jylla u Conrad K Sangma ha ka sngi Palei ula pyllait paidbah ïa ka prokram ban sam ïa ki tiar sumar ïa ki Kmie bad ki Khunlung ne ka Maternal & Child Care Kit hapoh ka Mission 1000 sngi ka Sorkar Jylla ha ka jingïalang ba long ha Rongara, ha South Garo Hills.
Ka Mission 1000 sngi ka shim ïa ka rukom ïaid ka jingim sha ka jingheh jingsan ki Khunlung, ka por naduh ba dang pun ha kpoh haduh ka jingdap 3 snem ka long kaba kongsan ïa ka met ka phad ki khunlung, ka bor ban lah ithuh, ban don jingsngew bad ka heh ka san ha ryngkat ka imlang sahlang.
Kane ka prokram ka thmu ban pynthikna ba ki Kmie bad ki Khunlung ki ïoh ïa ki jingsumar, jingkyrshan bad ki jingsngew thuh kiba donkam ha ka por kaba kongsan tam.
Kum shibynta jong ka prokram, yn sam ïa ki tiar sumar ïa ki Kmie bad Khunlung sha baroh ki Kmie kiba kha ïa ki khun ha ki jaka sumar ka Sorkar hapoh ka Jylla. Kine ki tiar sumar ki kynthup ïa ki tiar na ka bynta ka Kmie bad ki Khunlung, kynthup ka pla na ka bynta ka Kmie, ki jaiñ na ka bynta ki Khunlung, ka blanket bad ki tiar sumar khunlung.
Kine ki tiar kin don ïa ka shithi na u Myntri Rangbah, ka ban batai ïa ka jingkongsan ka jingheh jingsan ki khunlung naduh ba dang lung ka rta bad pynshlur ïa ki kmie kpa ba kin ai ka jingsumar kaba biang, ka bam tei met, jingpynshlur bad jingpynheh pynsan kaba biang ha ki snem ba u khunlung u dang san.
Haba ai jingkren, u Myntri Rangbah ula ban jur ba ka jingbei na ka bynta ki Khunlung ha ka por ba ki dang lung ka rta ka dei ka jingbei naka bynta ka lawei jong ka Meghalaya. Ka Mission 1000 sngi ka kwah ban pynkhlaiñ ïa ka jingpynsngewthuh bad kyrshan ïa ki Kmie bad ka ïing ka sem jong ki haba buh ïa ka heh ka san ki Khunlung hapdeng eh jong ka jingpyrshang ka Jylla ban tei ïa ka lawei kaba koit ba khiah bad kaba lah ban leh shibun kiei kiei.
Kane ka prokram la khmih lynti ba kan pynmyntoi ïa kumba 70,000 ngut ki Kmie ba armet bad ki Khunlung ha kylleng ka Jylla ha une u snem ba mynta.
