Shillong, Nailur 11: U nongïalam ka BJP bad MLA ka Pynthorumkhrah constituency Bah AL Hek ha ka Sngi Thohdieng, ula ïakynduh ïa u Myntri kam pohïing ka Ri u Amit Shah bad ïathuh ba ka party ka dang pynkhreh shaid shaid ban ïeng marwei ban thaw ïa ka Sorkar ba marwei ha Meghalaya.
Haka kyrwoh hadien ka jingïalang bad u Amit Shah, u Bah Hek u la ong ba u la ïoh ïa ka kabu ban ïakynduh ïa u Amit Shah na ka bynta ban ïakren bniah halor ka jinglong jingman bad jingkhih ka saiñ pyrthei ha Meghalaya.
Halor ka FCRA Bill kaba la pynmih ïa ka jingsngewkhia hapdeng ki kynhun riewngeit Khristan, u Bah Hek u la ong ba u Amit Shah u la pyntip ïa u ba ki jingïamir jingmut ki la ïaid shakhmat.
“U Myntri ka tnat kam pohïing u la ong ba u la dep ïakynduh ym duna ïa ka 35 tylli ki kynhun riewngeit Khristan bad ki nongïalam ha kaba ïadei bad ka FCRA. Kumba ka long mynta, ïa kane ka Bill la phah sha ka Joint Parliamentary Committee ban ïakren bniah. Hadien ba la dep bishar bniah da ka JPC, un sa khot ïa ngi sha Delhi ban ïakren bniah” la ong u Bah Hek.
U Bah Hek u la ong ba u la iakren ruh bad u Amit Shah halor ka sain pyrthei ha Meghalaya bad ka jingkyrmen jong ka BJP ban ioh thaw Sorkar.
“Nga la pyntip ia ka jingbishar jong nga ia ka jinglong jingman jong ka sain pyrthei ha Meghalaya. Ka don ka lad ia ngi ban ioh thaw Sorkar marwei bad kum ka party kaba khlain, kaba lah ban ioh jingshaniah naki paidbah” u la ong.
Haba pynpaw ïa ka bynta kaba hakhmat eh na ka bynta ka BJP, u Bah Hek u la ong, “Nga la pan jingmut bad jingkyrkhu na u Amit Shah kumno ban pynkhlaiñ ïa ka Party jong ngi ha kylleng ka jylla, ban ïoh ïa ka jingshaniah na ki paidbah, bad ban trei ha ka ban ïoh thaw ïa la ka jong ka Sorkar.”
Da kaba pynpaw ba don ka jingkylla kaba stet haka saiñ hima sima ha Meghalaya, u Bah Hek ula ong, “Ka jinglong jingman ha ka saiñ hima sima ka nang kylla. Ngi la pynkhreh ban shim ïa kane ka kabu da ka jingkut jingmut bad da ka jinglong ryntih.”
“Ka thong jong ngi kam dei tang ban ïashim bynta ha ka saiñ pyrthei jong ka Meghalaya, hynrei ban ai ïa ka jinglong nongïalam kaba khlaiñ, kaba skhem bad kaba don ka jingkitkhlieh lyngba ka sorkar jong ngi hi” ula ong.
