Kut ka jingïakajia hapdeng ki kali tourist Meghalaya-Assam, yn pynbiang jaka pynïeng kali bad jaka leit shabar: Dhar

Shillong, Nailur 8 : Ka jingïa kajia hapdeng ki kynhun jong ki kali tourist na Meghalaya bad Assam, kaba mih hadien ka jingjia ha ka 19 tarik u bnai ba la dep, ka la kut hadien ba baroh ar jylla ki la mynjur ban pynthikna ba ka kamai kajih jong ki kali tourist kin ïaid beit khlem jingeh.
La pyntip ïa kane hadien ka jingïalang ba la pynlong ha Shillong ha ka Sngi Ba-ar hapdeng ki hynñiew tylli ki kynhun na Assam bad san tylli ki kynhun na Meghalaya.
Ha kane ka jingïalang la don lang naduh u Symbud Myntri Rangbah ka Meghalaya uba peit ïa ka tnat Transport, u Bah Sniawbhalang Dhar, bad u Myntri Sorkar Assam, u Atul Bora.
Haba kren bad ki lad pathai khubor, u Bah Dhar u la ong ba ka jingïalang ka long kaba ïaid beit bad baroh ki mat kiba ki kynhun ki la pynsngew la ïoh ban ïatai sani bha.
“Ki kynhun na Meghalaya ki la pan jaka pynïeng kali ha airport ryngkat ki jaka leit bar kiba biang bad ïa kane na ka liang ka sorkar Assam ka la mynjur bad kan pynbiang ïa ki,” u la ong.
U la ong ruh ba baroh ar sorkar ki la bthah ïa ki pulit jong baroh ar jylla ban trei lang, khnang ban ym don jingeh ne jingpynshitom ïa ki nongñiah kali ha ka por checking.
“Baroh ar ki kynhun ki la kular ban trei lang naduh mynta. Lada dang don ki jingeh kiba hangne hangtai, yn pynbeit noh ïa ki hapoh katto katne sngi,” u la ong.
U Bah Dhar u la bynrap ba ka sub-committee, kaba la khlieh da ki Transport Commissioner jong baroh ar jylla, kan ïakynduh haba donkam ban pynbeit ïa ki jingeh kiba lah ban mih ha kano kano ka por.
Haba kren shaphang ka jingjia, u Myntri sorkar ka Assam, u Atul Bora, u la ong ba u Myntri Rangbah Assam, u Himanta Biswa Sarma, u la bthah ïa u ban shimkhia mardor ïa kane ka mat bad Meghalaya hadien ka jingjia ha ka 19 tarik u bnai ba la dep.
“Ha ka 22 tarik jong u bnai ba la dep, ngi la ïakynduh ha Guwahati bad ngi la shim ïa ki rai. Nga la ïakynduh ïa ki kynhun ba ïakhih bad ki la weng noh mardor ïa ka jingïakhih,” ong u Bora.
U la ong ba ka jingïalang kaba bud ha ka Sngi Ba-ar la pynlong katkum ka jingkyrpad jong ki kynhun Meghalaya.
Ha kajuh ka por u la pyntip ruh ba ka jinglong jingman ka la thanda jai bad ka la ïaid beit ïaid ryntih. “Baroh ki kynhun ki la pynpaw ka jingsngewhun,” bynrap biang u Bora.