Pynsangeh ïakhih ki Nurse NEIGRIHMS ai por haduh ka 17 tarik Nailur ïa ki bor pynïaid

Shillong, Nailur 8: Ka jingshakri jong ki Nurse ha North Eastern Indira Gandhi Regional Institute of Health & Medical Sciences kan bteng kumba ju long hadien ba ka NEIGRIHMS Nurses Association (NNA) ka la mynjur ban pynsangeh shwa ïa ka rai ban shim shuti paidbah da hynniew sngi da kaba ai por iaki bor pyniaid ka NEIGRIHMS tad haduh ka 17 tarik Nailur 2026.
Ka Association ka la pynbna ban shim shuti paidbah naduh ka 9 tarik u Nailur ban pynbor ïa ki bor pynïaid ba kin pyntreikam ïa ki mat jingdawa hynrei ka la rai ban pynsangeh noh shuwa hadien ka jingïalang bad ki bor pynïaid ka Institute.
Ha ka kyrwoh, ka NNA ka la ong ba ki bor pynïaid ka NEIGRIHMS ki la pan por shi taiew ban rah ïa ki mat sha ka tnat Ministry of Health and Family Welfare (MoHFW) shwa ban pynlong ïa ka jingialang jong ka Governing Council
Ka NNA ka la ong ba ka jingpynkynriah shipor ïaka jingshim shuti paidbah ka long ban ailad ïa ka jingïakren hynrei ka la kren shai ba kam pat weng satia ïa ki mat jingdawa.
Ki jingdawa ki kynthup ïa ka jingthungkam noh ha ki kam Nursing Officer ba lait thylli, ban weng noh ïa ka jingtyrwa ban shim nabar ïa ki Nursing Officer, ban pyntreikam ïa ka MoHFW Office Memorandum jong ka 30 tarik Jymmang 2026, bad ban pynlong kloi ïa ka eksamin thung kam.
Ka la maham ba lada kam don kano kano ka sienjam ka ban pynhun ïa ki mat jingdawa hapoh shi taiew, ka Association kan pynïaid shakhmat ïa ka jingïakhih da kaba sangeh treikam khlem pud sngi naduh ka 17 tarik Nailur.