Pynbud sa ki jingïakhih ba khlempud ba kuman ki bor pynïaid ïa ki jingdawa ba shongnia jong ki

Shillong, Nailur 07: Ka NEIGRIHMS Nurses Association (NNA) kaba dei ka seng jingshakri ki nurse ha North Eastern Indira Gandhi Regional Institute of Health & Medical Sciences ka la rai ka ban shim shuti paidbah ha ka 9 tarik Nailur, bad ban pynbud pat sa da ka jingïakhih ba khlem pud naduh ka 17 tarik Nailur lada ïa ki jingdawa jong ki ym lah ban pynbeit kumba ki la angnud.
Na ka liang ka Association ka la pyntip ba kan pynjur shuh shuh ki jingïakhih naba ïa kane ka sienjam ka la wan jia hadien ka jingbym leh eiei ki bor pynïaid ïa ki jingdawa ba la sahteng la slem bha wat hapdeng ki jingthoh ba bunsien kiba dei na ka bynta ka bha ka miat jong ki nongtrei nurse ha kane ka jaka sumar kaba don ha kane ka jylla.
Lyngba ka kyrwoh khubor na ka liang ka NNA ka la buh ïa saw tylli ki mat jingdawa kaba kynthup ka jingthungkam pura ha baroh ki kam ba la mang (santion post) ba lait thylli jong ki Nursing Officer, ban wengnoh ïa ka jingtyrwa ban shim ïa ki Nursing Officer nabar, ban pyntreikam a ka Office Memorandum ka Health Ministry ba 30 tarik Jymmang, 2026 bad pynlong noh kloi ïa ki eksam thungkam ba sahteng.
Shuh shuh ka Association ka la ïathuh ruh ba ka la dep ban pynlong teng ïa ka jingïakhih ba malu mala kum ka dak ka jingpyni ba kitei ki jingdawa ki long kiba shong nongrim bad kitei ki jingïakhih ki kynthup ka jingdeng ïa ki badge rong ïong naduh ka 17 tarik Nailar bad pynlong ïa ka dharna ba man ka sngi naduh ka 18 tarik Nailar haduh 21 tarik Nailar.
Ïa ka rally kaba la buh ban long ha ka 21 tarik Nailar la pynsangeh noh namar ka jingpynjari ïa ka kyndon 163 jong ka BNSS kaba dei na ka bynta ka jingbha bad ka jingdonkam ban pynneh ïa ka suk ka saiñ ha ka nongbah.
Ka Association ka ïathuh ba ïa ka jingïalang la pynlong ha ka 19 tarik Nailar bad u Myntri ka Tnad ka Koit ka Khiah ka Jylla u Bah Wailadmiki Shylla bad Director Prof. Nalin Mehta, hynrei ym shym la ai satia ïa kano kano ka jingkular halor ki jingeh jong kiba trei nurse ha kane ka jaka sumar.
Ka NNA ka la ai ïa ka notice ba 14 sngi ban shim da ka shuthi paidbah bad kan pynïaid shakhmat bad ka jingïakhih kumba la rai.
Shuh shuh ka NNA ka la kren ruh da kaba shai ba lada kitei ki jingdawa jong ki kim lah ban long kiba seisoh kin ïaid shakhmat ruh bad ka jingpynlong ïa ka jingsangeh treikam kaba khlem buh por naduh ka 17 tarik mynta u bnai kumba ki la dep ban pyntip sha ki bor pyniaid jong ka hospital.
Ka NNA ka kyntu ïa ki bor pynïaid bad ki bor ba dei khmih ba kin sdang noh ban shim ki lad lynti jong ki jingïakren bad ban shim ki sienjam ba shai, ki sienjam ki ban long ha ka por khnang ban lah ban pynbeit ïa kine ki jingeh kiba la neh la slem bha.