Ka NPP ka tylli mlon ym don uwei ruh u MLA ba khih ban kynthih sha ka BJP : Dy CM

Shillong, Nailur 07 : U Symbud Myntri Rangbah ka Jylla ba bat ruh kum u National Vice President ha ka National People’s Party u Bah Sniawbhalang Dhar u la ong ba kam don kano kano ka jingma ïa ka party watla ka saiñpyrthei ha ka jylla ka khih phaloh bha mynta shipor. U la kyntait halor ki jingkynnoh ba ki don ki MLA ka NPP kiba thmu ban rung sha ka BJP bad kumba long mynta ka party ka ïa tylli lang mlon hapoh ka jingïalam u Myntri Rangbah u Conrad K Sangma.
Haba kren bad ki lad pathai khubor u Bah Sniawbhalang u la ong ruh ba u la ïohi ïa ka jingkhih phaloh ha kiwei ki seng saiñpyrthei ha kiwei ki party kiba don lang ha ka sorkar MDA hynrei kane kam don jingma ei ei pat ia ka NPP. Ki jingkynnoh ba ki don ki MLA ka NPP ki ban rung sha ka BJP ki dei tang ki khubor hamsaia kiba shu mutdur bad ki bym shisha.
“ Ngi ha ka NPP ngi ïa tylli kum kawei ka ïing naduh u Myntri Rangbah, ma ngi baroh arngut ki Symbud Myntri Rangbah kata ma nga bad u Bah Prestone, ki Myntri bad ki MLA ngi ïa long kawei bad ngim don jingïapher jingmut ngi ïalong mar kumjuh, ngi ïakmen lang bad ym don kano kano ruh ka jingbym ïasngewthuh jingmut dei tang ka jingpynphriang khubor na kiwei ki party” ong u bah Sniawbha da kaba ong ruh “ ïa kane nga kren ym tang kum u Symbud Myntri Rangbah hynrei kum u Nongïalam jongka Party ruh.
“Kam don kano kano ka jingkhih ne ka jingbym sngewthuh jingmut hapoh ka NPP,” ong u Bah Sniawbhalang haba kren bad ki lad pathai khubor.
U la ong ruh ba kam don eiei kumba la mih khubor ba ka don ka jingkhih phaloh ne jingïapher jingmut ha ka NPP, bad kam ba baroh ki MLA ki ïa tylli lang ha ka NPP. Ym don uwei ruh uba thmu ban mih noh na ka party bad pyniasoh sha ka BJP
Ha kaba ïadei bad ka UDP ba kin leit sha ka BJP, u la ong ba um don eiei ban kren ïa ka kam ïing jong kiwei ki party, bad kam don jingma eiei ïa ka Sorkar MDA II.
Ha ba kylli halor ka jingphriang ki khubor hamsaïa ba un shimti kum u Myntri Rangbah ka Jylla, na ka liang u Bah Sniawbhalang Dhar u la kyntait da kaba ong ba kam dei kaba shisha. “U Conrad Sangma un bteng kum u Myntri Rangbah ka Jylla haduh ban da kut ka samoi treikam ha u 2028.
Halor ka jing kylli, u Bah Sniawbhalang Dhar u la kyntait ruh ba ka don ka jingtyrwa na ka BJP ne na kino kino ki MLA ba un long u nongïalam jong ki. Hynrei u la pynskhem ba ka Sorkar MDA II ka skhem bad kan neh haduh kaba kut jong ka samoi.
Halor ka Election MLA ha u 2028 u la ong ba ka NPP kan jop palat ïa ka 33 ngut ki MLA bad kan bteng biang ïa ka jingsynshar tangba kan ïai burom bad ïatrei lang bad kiwei ki paralok kiba la ïatrei lang baroh shi katta.
U ong wat mynta ruh ka NPP ka la don 33 ngut ki MLA lem bad 2 ngut ki Independent hynrei kam iehnoh ïa ki paralok kiba ïatrei lang naduh kaba sdang bad kata ka dei ka nongrim ba ka NPP ka ïeng ban burom lut ïa baroh ym ban leh shilliang khmat ne kdup tang ha ka por ba donkam.
Halor ka jigthmu rung BJP ki 9 ngut ki MLA ka UDP u la ong ba kata ka dei ka rai jongki kam dei ba ka BJP ka khring ïa ki hynrei ki rai ban leit pynïasoh hi bad kane ka jia namar lehse ka don ka jingbym ïahun ne ïa sngewtynnad hapoh ka party jongki.
U la kren shai ruh ba kane ka sorkar MDA kan neh haduh ba kut ka san snem bad kan wan phai biang ruh ha ka por hadien ka election 2028. “ Ngin pyndep ïa kane ka samoi haduh ba kut bad ngin wan phai biang ha ka bor hadien ka election ha u 2028” ong u bah Sniawbha.
Haba kylli hato don kiba tyrwa ba un shimti ïa ka kam Myntri Rangbah u iathuh ba kam don kum kata bad haba kylli hato u kloi ban shimti ïa ka shuki lada ka kam ka dawa u la ong kane ka jingkylli ka long kaba pher bad kam dei ka por ban ïakren.
Halor ka jingtan ka BJP ïa kiwei ki MLA na kiwei ki party ha kiwei ki jylla, hato kane kan jia ha Meghalaya u la ong sha kiwei ki jylla um don jingtip hynrei hangne ha Meghalaya kam don kaba kum kata.