Hapoh 25 sngi mynta la lah ban phah buhlypa ïa ki tyndong lyer shet ong u Myntri ka tnat Petroleum

Shillong, Nailur 07: U Myntri ka Sorkar Pdeng u Suresh Gopi ha ka sngi Nyngkong u la ong ba ka sorkar pdeng ka la kyntu ïa ki karkhana sam umphniang (oil marketing company) ba kin pyntreilang tang kawei ka jingphah buh lypa ïa ki tyndong lyer shet jingshet ban pyndap ïa kiba la thylli kumba la dep ban pynbeit thymmai (revised LPG refill booking) kaba dei mynta ha ki 25 sngi hapoh ki jaka sor bad kumjuh ruh ha ki thaiñ nongkyndong bad kane ka dei ban treikam noh mardor.
U Gopi, u ba dei u Myntri Khynnah ka sorkar pdeng ba khmih ïa ka tnat Petroleum, Natural Gas bad Tourism, u la ong ha ka Facebook post ba na ka daw jong ka jingpynbor halor ka jingsam ïa ka LPG na ka daw ka jingmih ka jingïakajia bad ka thma ha ki ri phang pdeng mihngi (Middle East conflict), ka por ban buh ne tyrwa ban pyndap ïa ki tyndong lyer ka la long ha ki 25 sngi ha ki thaiñ sor bad kumba 45 sngi ha ki thaiñ nongkyndong.
“Ha kawei ka liang haba bishar ïa ka jinglong jingman ka jingsam ïa ki tyndong lyer ha kane ka por mynta ka jinglong jingman ka la khambha bad ka jingsam ne ka jingduna ka LPG ban pyndap ka la kham biang, kumta ka sorkar pdeng ka la pynjynsur noh ïa ki jingpyrkhing. Mynta baroh ki briew kiba pyndonkam ïa ki tyndong lyer shet ha ki ïing khlem da kheiñ la ki dei na sor ne nongkyndong ka jingphah buh lypa ban pyndap ïa ki tyndong lyer kan long beit ha ki 25 sngi,” u la ong.
U Myntri ha ka post, u la sam bad pyni ruh ïa ka copy jong ka shithi ba la pynmih da ka Petroleum Ministry sha ki OMC ba kin pyntreikam noh mardor ïa kine ki jingpynkylla.