Khih phaloh bad sdang ngam ka lieng ka UDP lah ban sah sa tang 1 ne 2 ki MLA : Paul

Shillong, Nailur 6 : U nongïalam ka United Democratic Party (UDP) u Bah Paul Lyngdoh ula ong ba ka party jong u ka UDP ka la khih phaloh bad sdang ban ngam naduh ba weng noh ïa u na ka Kynhun Myntri bad mynta bun ki MLA ka Party ki dang bteng ban ïai ïakren bad pynbeit bad ki Nongïalam ka BJP na Delhi bad kaba sngewsih ka long ïoh ka UDP kaba dei ka party kaba ïaleh ban pynïoh ïa ka jylla ba pura ka lah ban sah sa tang 1 ne 2 ngut ki MLA.
Kane ka jingkynthoh ka la mih hapdeng ki jingmih ki khubor ba 9 ngut na ki 12 ngut ki MLA ki la pynkhreh ban leit pynïasoh noh sha ka BJP.
“Kumba nga ong ha ki khyndiat sngi, bun ki MLA ki la iakren bad ki nongïalam ba hakhlieh ka BJP. Kane ka pyni ba ka don ka kynrum kynram bad ka jingbym ïaid beit ïaid ryntih hapoh ka UDP” ong u Bah Paul, MLA ka West Shillong constituency.
Une u Myntri Sorkar barim ula ong ba ki MLA ka UDP ki bunkam ha ki kam pynroi ha ka por jong u ba dang bat ïa ka shuki Myntri.
“Ha ka por ba nga dang don ha ka Kynhun Myntri. Nga pyrshang kat kaba nga lah ban trei kam. Kane ka mut ba ki MLA ka party ruh ki ïa bunkam lang bad bun ki project bad ki skhim la wanrah ha ki constituency jong ki. Hadien kane, phi ïatip lut ïa kaei kaba jia” ula ong.
U Bah Paul ula bynrap “Kan long kaba bakla na ka liang jong nga ban ïaroh ïalade, hynrei kaei kaba jia mynta ka pyni ïa ka kyrdan kaba ka party kala ngam”.
U ong ba ka long kaba sngewsih ban ïohi ïa ka nusib jong ka party kaba la kha na ka jingïakhih Hill State.
“Kum u Nongïalam uba don ïa ka mynsiem riewlum, Nga shem ba ka long kaba sngewsih shibun ba ka party shisien ka por kaba ïasoh bad ka jingïakhih Hill State ka la mad mynta ia ka jinglong ban hiar ha ka jingdon ki MLA satang 1-2 ngut. Ngam kwah ban kynnoh ïano ïano ruh halor ka jinghiar ka UDP” ula ong.
Haba kylli la ka UDP ka donkam ïa u nongïalam thymmai, ula ong “Kata ka jingbishar ka dei ban mih na ki fourth estate (lad pathai khubor). Kum ha ka jingïalehkai ka Langsning FC, u rang ïlehkai um lah ban batai ïa ka rukom ïalehkai jong u. Dei u coach bad ki nongpeitkai kiba lah ban bishar ïa ka jingtbit jong uwei pa uwei u rang ïalehkai”.