Shillong, Nailur 6: U MLA barim jong ka Nongthymmai uba la ju bat ruh ïa ka kam kum u General Secretary bad ruh kum u Vice President barim jong ka United Democratic Party (UDP) u Dr Jemino Mawthoh u la rai ban pynïasoh noh ïalade sha ka Bharatiya Janata Party (BJP).
Kum ban shu kdew ba u Bah Jemino Mawthoh ha ka jingïakynduh bad u nongthoh khubor Mawphor ha ki katto katne bnai kiba la leit noh u la pynpaw ba un sa rung noh sha ka BJP, hynrei u la buh ka jingkyrpad ba ym dei ban thoh eiei namar ba u hap ban ïa kren shwa bad ki nongkyrshan.
Ha ka sngi Saitjain u Bah Mawthoh u la pynpaw ba un rung noh sha ka BJP ha ka 12 tarik mynta u bnai Nailur, hadien ba u la dep ban pynlong ïa ka jingïalang ha kaba ïadei bad kane ka bynta.
“Haba pynshong nongrim katkum ka jingsngew ki paidbah nongkyrshan, Nga la shim ïa ka rai ban pynïasoh noh bad ka BJP ha ka 12 tarik u Nailur” la ong u MLA barim jong ka Nongthymmai.
“Kiba sngewthuh ha ka jingshisha ki la ong naduh u snem 2020-21, hynrei ngam kwah ban rai kyrkieh namar ha ka rai sain pyrthei ka dei ban da long kiba pyrkhat sani shwa ban shim rai”, u la ong.
Kum ban shu kdew u Bah Mawthoh u la risain na ka UDP ha u bnai Jymmang mynta u snem 2026.
Haba pynpaw ïa kid aw ha ka por ba ïa kynduh bad u nongthoh khubor u Nawphor, u Bah Jemino u la ïathuh ba ka jylla Meghalaya baroh ka dang ap beit na ka BJP ba ïalam ïa ka sorkar ha Delhi bad kan eh aiu lada shu pynïasoh beit bad ka party BJP.
