Burom ka NPP ïa ka WKH da kaba pynïeng ïa nga kum u kyrtong : Dr DRL Nonglait

Shillong, Nailur 6 : U Kyrtong ka NPP ban ïakhun ia ka elekshon shiteng samoi jongka MP Lok Sabha na ka Shillong Parliamentary Constituency u Dr. DRL Nonglait ula kyrpad ïa ki nongthep vote ka West Khasi Hills da kaba ong ba ka thaiñ kam pat ju don ïa ki nongmihkhmat ha Parliament bad ka NPP ka la burom ïa ka district da kaba pynïeng ïa u kum u kyrtong.
Haba kren ha ka jingïalang ïalap elekshon ha Maweit kaba hap hapoh ka Mawshynrut Constituency ha ka sngi Saitjain, u Dr Nonglait ula ong “ka WKH kam pat ju lah ban pynmih ïa u nongmihkhmat. Ngi la ïoh ïa u MP ba tang arsnem. Ka NPP kam shym la niewbeiñ pyrshah ïa ka WKH. Ha ka por ba ka NPP ka khot ïa nga, ka kynmaw ïa phi, ki paidbah ka WKH. Ka WKH ka don ïa ka hok bad ka NPP kam shym la leh shiliang”.
“Lada u Bah Sniawbhalang u ong ba ha ri-lum Jaintia, u Dr Nonglait un tam bun bha ha ka jingïoh vote, ha WKH ngi dei ban tam kham bun shuh shuh” ula ong.
Ula kular ba lada u shah jied kum u MP un treikam khlem ka jingkheiñ party. “Kum u President ka KAS, Nga kren na ka bynta ki Khasi, Pnar, Lyngam ba kin kiew shakhmat ha la ki shnong ki thaw. Ha ka seminar bad ki kot jong nga, Ngam ju kren tang ïa kawei ka party. Nga trei na ka bynta baroh. Mynta lada phi jied ïa nga kum u MP, Ngam trei na ka bynta baroh, kan nym don ka jingsngew ïapher party” ula ong.
Haba batai balei ba u jied ïa ka NPP, u Dr Nonglait u ong ba ula shim ïa kane ka rai hadien ka jingpyrkhat kaba sani bha.
“Nga ïeng ha kane ka rynsan saiñ pyrthei hadien ka jingbuh ïa u mawnongrim uba skhem, hadien ka jingthew jingwoh bha. Balei ba nga ïatreilang bad kane ka party? namar Nga ïohi ba kane ka party ka dei kaba treikam bha” ula ong.
Ula kdew ïa ki kam pynroi ban kyrshan ïa ki jingkam. “Ngi la ïoh ïa ka C&RD Block ha Shallang ba la plie ha u 2022, ha Nonglang ruh ka la don ka Block nalor ka jingïoh ïa bun ki skhim bad kane baroh ka dei namar ka jingtreikam ka Sorkar. ka surok Nongstoin-Rambrai-Kyrshai ruh ka la bha mynta bad ka dei kane ka Sorkar kaba wanrah ïa ka” ula ong.
U ong ba ka Sorkar MDA kala pynrulong ïa ki jingdawa kiba la sahteng la slem bha. “Dang shen ha ïing Dorbar Thaw Aiñ, kala mynjur ïa ka resolution ban kynthup ïa ka ktien Khasi ha ka Khyrnit ba Phra. Ngi la dawa ïa ka lah bun snem hynrei dei ka Sorkar MDA ba ïalam da ka NPP kaba nud ban shim ïa kane ka rai. Na ka bynta ka ILP ruh ka dei kane ka Sorkar kaba la mynjur ïa ka resolution nalor ban pynlong ïa ka ktien Khasi kum ka Official Language, ban pyrshah tih uranium ha ka jylla ruh dei kaneka sorkar kaba wanrah ïa ka Resolutioin haoh ïing Dorbar” ula ong.
Ula kren ruh halor ka bynta jong u kum u Director jong ka College Development Council. “Ka Jylla kam pat ju don ïa ka medical college. Myn shem snem ka Sorkar ka la plie ïa ka medical college ha Shillong, ka Shillong Engineering College ruh lah dep ban plie. Mynta kane ka Sorkar kan sap lie sa artylli ki Nursing College ki bym pat ju don mynno mynno ruh bad baroh kine ki wan lyngba ka Council ba nga khlieh kum u Director. Ka dei ruh kane ka Sorkar kaba la wanrah ïa ka State University” ula ong.