Ha ka rakhe ka Youth Week, khot u Rev. Kharkongor ïa ki Samla ban pynshai ïa ka jingshai ka jingngeit

Shillong, Nailur 06: U Pastor Rev. T. Kharkongor u la kyntu ïa ki samla Khristan ba kin im kum ka jingshai, ban long ki nuksa babha bad ban pynpaw ïa ka burom U Blei lyngba ki kam bad ka jingim jong ki.
Ha kaba ïadei bad kane haba ïalap ha ka jingïaseng nohphai sngi jong ka Youth Sunday, kaba la pynlong da ka Senior Christian Endeavour Society jong ka Lumshyiap Presbyterian Church ha ka 6 tarik Nailur, u Rev. Kharkongor u la ong ba ka jingshai jong ki samla kam dei ban rieh ne shah tap, hynrei ka dei ban tyngshaiñ ha khmat ki briew baroh.
U la pynkynmaw ba ki samla ki don ka kamram kaba khraw ha ka Balang bad ha ka imlang sahlang. Kumta, u la kyntu ïa ki ba kin pyndonkam hok ïa ki sap, ki lad bad ki kabu kiba U Blei u la ai ha ki, bad ban im da ka jingaiti lut, ka jinglong hok bad ka jinglong nuksa.
Wat hapdeng ki jingeh, ki jingpynshoi bad ki jingïakhun jong ka juk mynta, u Rev. Kharkongor u la kyntu ïa ki samla ba kin ïaineh skhem ha ka jingngeit bad shah ïa ka jingshai U Khrist ba kan tyngshaiñ lyngba ka jingim jong ki.
Da ki spah ngut ki samla jong ka Balang ki la ïashim bynta ha ka sngi pynkut ïa ka Youth Week bad Youth Sunday. Ka Senior Christian Endeavour Society Lumshyiap ka la pynlong ïa kane ka taïew kyrpang naduh ka 31 tarik Nailar haduh ka 6 tarik Nailur, 2026, ban pynskhem ïa ka jingngeit bad kyntiew ïa ka jingïashim bynta jong ki samla ha ka kam shakri Khristan.
Ka phang pdeng jong ka taïew ka long, “To sumar ïoh phi long ka sharak ba la tap,” kaba la sot na ka Gospel u Loukas 8:16.
Ha ka jingïaseng Youth Sunday, u Bah Nangsanborlang Syiem bad ka Sancy Mawlong ki la pule ïa ka Ktien U Blei na ka Testament Barim bad ka Testament Bathymmai, katba ka Mercy Mawlong ka la ïalam ïa ka jingduwai.
Ka la don ruh ka jingrwai kyrpang na ki dkhot ka Senior Christian Endeavour Society Lumshyiap. Ha ka jingïaseng pynkut, ki samla ki la ïoh ban rwai lang ïa ki jingrwai kiba ïadei bad ka phang, da kaba pynpaw ïa ka mynsiem jong ka jingïatylli, ka jingngeit bad ka jingaiti ha ka kam shakri ïa U Khrist bad ïa ka Balang.
Ha kane ka sngi na ka liang ki samla jong ka Balang ki la shim bynta shitrhem bha ha ki jingduwai, pynleit jingmut ha ka ktien jong U Blei bad kumjuh ruh ha ki jingrwai ba shoh mynsiem jong kane ka kam ïalap ki khun samla ka Balang.