Nongpoh, Naitung 28: Ha kawei ka jingjia aksiden ba shyrkhei hynne ka step, kawei ka Bos Night Super kaba don ïa u Number AR 16 A 5022 kala pra phom bad julor haki bynta ba shakhmat hadien ba u nongñiah u la leit ban tynrah hi nadien jong kawei ka trok kaba dang ieng kaba don ïa u number NL 01 AA 8595 kaba dang ïaid ha surok bah National Highway haka thaiñ Nongpoh.
Katei ka jingjia kala jia hynne ka step haka por 7 baje eiei bad ki paidbah kila sakhi ruh ba katei ka jingleit tynrah nadien jong ka trok ka dei namar ka jingpynher sted palate nongñiah ïa katei ka bos haduh ba um lah shuh ban tehlakam bad leit ban tynrah beit nadien jong katei ka trok, ha kaba katei ka bos kala pra phom haki bynta ba shakhmat haduh ba u nongñiah u la mynsaw jur bad sahkut hapoh katei ka bos.
Naka liang ki paidbah kiba la sakhi ïa katei ka jingjia kila leit ruh ban ïarap sei ïa utei u nongñiah bala tip kyrteng kum u Nur Ahmed (33) na Hailagandhi, Assam bad pynkit mar mar sha Civil Hospital Nongpoh, hynrei namar ka jingmynsaw kaba jur utei u nongñiah u la khlad noh hashen bad ka jingtohkit jong ki pulit halor katei ka jingjia ka dang ïaid shakhmat.