Shah ujor ki dkhot ka HITO ba shah kynnoh ktah kti ïa ki nongtrei jong ka Riangdo Veneers Pvt. Ltd

Shillong, Nailur 05: Ka khubor ba la ïoh la ïathuh ba ki dkhot jong ka Seng Hynñiewtrep Integrated Territorial Organisation (HITO) ki la shah ujor ha Madanriting Police Station halor ka jingkynnoh ba ki dkhot ka seng ki la ktah kti ïa ki 3 ngut ki nongtrei jong kawei ka kompeni ha ka 3 tarik mynta u bnai ha Mawblei.
Katkum ka jingujor ba la ujor da ka Riangdo Veneers Pvt. Ltd., ki laingut ki nongtrei kiba kynthup ïa u Pralay Kumar Jana, Factory In-charge; Gautam Bora, Director; bad Casper Tariang, Area Sales Manager, ki la leit sha Mawblei na ka bynta ka jingïalang ba la pynbeit lyngba ka telephone hajan Rani Motors, pyrshah ka Abigail Petrol Pump.
Kitei kiba la ujor ki ong ba ki la poi ha katei ka jaka ha ka por kumba 3:30 baje janmiet bad ki la shah khot shajan kawei ka dukan ha ka por kumba 4:30 janmiet. Tang ïa u Bah Jana bad u Bora la shah ba kin rung bad shong hapoh ka kamra long jingïalang katba ïa u Bah Tariang la bthah ba un ap shabar bad 2 ngut ki briew bad uwei uba kyrteng u Lambert Mawlong. La kynnoh ba ki la bthah ruh ïa ki, ban ai ïa ki mobile phone jong ki.
La ïathuh ba hapoh ka kamra la pyni ïa ka thup jong ki jingdonkam bad la kyntu ba kidei ban shim rai noh mardor. Haba kitei ki nongtrei ka company ki la ong ba donkam ban ïasyllok bad ki bor pynïaid jong ka company, la kynnoh ba ki la shah ktah kti.
Kitei kiba la ujor shuh shuh ki la kynnoh ba hadien ba ki la mih shabar, ïa u Tariang ruh la kynnoh ba ki la ktah kti bad sha kynjat ha ka bynta ba shadien.
Ïa ki kyrteng jong kitei kiba la shah kynnoh ba la ai hapoh ka jingujor ka dei ka kyrteng u Lambert Mawlong, kiwei pat ki dkhot bym lah ban ithuh jong ka seng HITO kiba don ha ka jingïalang, bad kiwei pat ki briew kiba don jingïadei bad ka seng HITO.
Ki nongmihkhmat jong ka company ki la kyntu ïa ki pulit ba kin register ka FIR, ban ithuh ïa ki briew ki bym lah ban ithuh, ban shim ïa ka jingïathuh kiba ujor bad kiba sakhi, ban tohkit ïa ka jingjia bad ban pynthikna ka jingshngaiñ ïa kiba ujor halor kane ka jingjia.