Ka Sorkar ka dei ban plie 24 kynta ïa ka Channel pashat jingtip bad ka KSU ban lait na ki jingkulmar: Paul

Shillong, Nailur 5 : U Nongïalam jongka UDP bad MLA ka West Shillong Constituency u bah Paul Lyngdoh u la ong mynta ka Sngi Saitjaiñ ba ka sorkar ka dei ban plie 24 kynta ïa ka Channel pashat jingtip bad ka KSU halor ki mat jingdawa kiba la kular ban pyntreikam da ka sorkar khnang ban lait na ki jingkulmar kiba ktah ïa ka ïoh ka kot bad ka nam bad burom jongka jylla.
U la kren ïa kane halor ka jingbyrngem biang ka KSU ban pynjur ïa ki jingïakhih lada ka sorkar kam pyntreikam ïa ki san tylli ki mat jingdawa kiba ka la dep kular ban pyntreikam ha ka jingïakren ha ka 26 tarik Nailar 2026.
“ Ka long kaei kaei kaba donkam ïa kino kino ki Nongïalam ban don kata kaba ki ong ka jingbishar bniah kaei ka dor bad kaei ka jingïoh nong. Ha kano kano ka kam donkam ban bishar bniah ïa kaei kaba phi khmih lynti na ki kam ba phi leh kata kaei ka dor jongka bad kaei ka jingmyntoi ne jingïoh nong na ka” ong u bah Paul.
“ Nga ngeit skhem ba halor ki jingïakren bad jingïakular kata ka Channel pashat jingtip ruh ka dei ban plie barobor hapdeng ka sorkar bad ka KSU namar haba plie ïa katei ka channel bad don uwei na ki heh sorkar u ban don ka jingïakren bad pashat jingtip sha ki nongïalam ka KSU da kata ka lynti lah ban pynbeit ïa kino kino ki jingsngew khlem da donkam ban pyni mano ba don bor namar kine baroh ki long ki bym don jingmyntoi” ong biang u bah Paul.
U la ong “Ha kum kane ka por kaba nga kwah ban ban jur ka long ban ym don kata ka jingïajngai ha ka jingïa pashat jingtip hapdeng ka Sorkar bad ka KSU khnang ba kin ym ïaid da ka lynti kaba ktah ïa ka ïoh ka kot, ka jingïoh lum khajna jongka jylla nalor ka jingjah burom. Nga tharai kaba kongsan eh ka dei kane ka lynti ban ïaid ban don ka jingïadei kaba jan ban poi sha kata ka thong”