Wat hadien 6 bnai ym pat dep tohkit halor ka jingïap ki 3 ngut hapoh par dewïong be-aiñ ha EJHs

Shillong, Nailur 4 : Wat hadien hynriew bnai jong ka jingjia hapoh ka par dewiong beaiñ ha Mynsngat-Thangsko, kaba shim haduh 34 ngut ki mynsiem briew, ki Pulit kin dang pyndep ïa ka jingtohkit namar ka jingsahteng ka kaiphod post mortem jong kiba iap, pynpaw ka Justice BP Katakey Committee.
Ha ka Interim Report ba 40 bala aiti sha ka ïing Bishar High Court, ka Committee kala kdew ba kat kum ki jingtip ba ïoh na ka tnad Kam Pohïing (Police) halor ka jingtohkit ka SIT ïa ka Khliehriat PS Case No. 14/2026, la ong ba ïa ka jingpynngat kyndon ne charge-sheet la pyndep ha ka 18 tarik Rymphang, 2026 bad ïa ka charge-sheet bynrap la leh ha ka 24 Rymphang bad 6 tarik Jymmang.
Katba 15 tylli ki kaiphod post mortem lah lum na West Jaintia Hills ha ka 21 tarik Jymmang, kawei ka kaiphod na Ri-Bhoi kam pat poi satia. La pyntip sha ka Committee ba ym pat shym la ïoh pdiang satia ïa ki kaiphod post mortem jong baroh 34 ngut kiba iap ha ka jingïalang ba long ha ka 25 tarik Nailar.
“Ka Tnad Pulit ka donkam ban pynkloi ïa ka jinglum ïa ki kaiphod post mortem ba dang sah bad ban pyndep noh ïa ka jingtohkit” ong ka Committee haba pynpaw ba palat hynriew bnai ka por ka la ïaid naduh ba jia katei ka jingjia.
Ka kaiphod kala buh thup ruh ïa ki kam ba la leh da ki Pulit hadien katei ka jingjia-90 tylli ki ejahar ba tih dewiong beaiñ, 22 tylli ki ejahar ba khaïi beaiñ, 4 tylli ba tuh ïa u dewiong ba ïoh kurup bad 2 tylli halor ki tiar pynbthei. Ka kynhun ba pyntreikam ïa ki hukum ki kynthup ïa 4 kynhun ki mobile patrolling, 4 kynhun ki foot patrolling, 5 ngut ki flying squad bad 4 tylli ki NGT checkpoint ryngkat bad 92 sien ki survey da ki drone lah dep ban leh haduh mynta.
Kat kum ka kaiphod, haduh 18,962.966 MT u dewiong, 57 tylli ki kali, 5.5 kg u gelatin bad 74 detonators lah ïoh ban kurup nalor ka jingpynpra ïa 10 tylli ki kor machine.
La sospon ruh ïa arngut ki Heh Pulit- SI O.Nongtdu, Incharge ka Umpleng Outpost bad u AB SI S.Sympli jong kajuh ka outpost, ki la shah sospon ha ka 9 tarik Rymphang.