Pdiang ka ïingbishar HC bad MHRC ïa ka mukutduma jong ka JSU

Khliehriat Nailur 04: Ka ïingbishar jong ka Meghalaya High Court (HC) bad ka Meghalaya Human Rights Commission (MHRC) ki la pdiang ïa ka mukutduma ba la ujor da ka Jaiñtia Students Union (JSU) ha kaba ïadei bad ka jingbishar bad pynsngew paidbah (public hearing) jong ka company Shree Cement bad halor kane ka ïingbishar ka la shong bishar myn ha ka 1 tarik mynta u bnai.
Shuh shuh la ong ba ha kaba ïadei bad ka High Court, na ka liang ka sorkar ka la phah ka jubab ba mynta ka la phah pynsangeh lut ïa baroh ki kam jong ka company Shree Cement katba ka Fact Finding Committee ka dang pynlong ïa ka jingtohkit, tangba na ka liang ka seng JSU ka ong ba ka seng kam lah ban shaniah ïa ka sorkar hynrei donkam ïa ka jingtohkit kaba khlem shah shiliang.
Ka seng ka dawa ba dei ban pynlong da ka jingtohkit kaba peit da ka ïingbishar khnang ba ka jingtohkit kan long kaba khuid tat haduh ban da lap ruh ïa kito ki briew kiba donkti ha kaba pynmynsaw ïa ki briew, la ong ba na ka liang ka sorkar ka la pan por ban dup lah ban ai ka jubab kaba bniah bad yn sa nang shong bishar biang halor kane ha ka 7 tarik mynta u bnai.
Ha kaba ïadei pat bad ka Meghalaya Human Rights Commission (MHRC), na ka liang ka JSU kan sa ai ïa ki kaiphod halor ka jinglap ka seng ha ka 28 tarik mynta u bnai, kata ha kaba ïadei bad ki kaiphod jong ka Enquiry Report ba la ai da ki pulit bad ki bor district ki bym shai hangno hangno ruh bad ka JSU ka la kynnoh ba kane baroh ka dei ka jingpyrshang ban buhrieh ïa ki jingleh bakla jong ki da kaba ki thombor ïa kiba mut leit sha public hearing, ka seng ka la ong ba ha ki jingthoh jong ki pulit ki la dep thoh shai ba ka la don ka jingshah thombor ka kali Ambulance jong ka JSU ha ki briew kiba rah da ki tiar pynmynsaw ha ka por ba ki mut ban leit ai jingïarap.
Kumta ha kaba ïadei bad kane, ka JSU kan sa ai ïa ka jubab kaba biang ban kdew ïa kiei kiei kiba la pyrshang ban buhrieh.