Donkam bha ïa ka jingïatylli bad ban bud ïa ki lynti ka aiñ kyntu u Bah Erwin ïa ki Muster Roll

Shillong, Nailur 04: U Advocate Bah Erwin Syiem Sutnga, Co-Chairman ka State Law Commission, Sorkar Meghalaya, u la kyntu ïa ki dkhot ka All Meghalaya Muster Roll Progressive Workers’ Union (AMMRPWU) ba kin ïatylli bad bud ïa ki lad kiba dei katkum ka aiñ bad ka synshar paidbah ban pynurlong ïa ki jingdawa jong ki.
Haba kren kum u Adviser ka Union, u Sutnga u la ong ba ka jingïatylli ka dei ka atiar kaba khlaiñ tam jong ki nongtrei. U la kyntu ïa ki dkhot ba kim dei ban duh mynsiem, hynrei ba kin ïai trei lang ban ïada ïa la ki hok bad ka bha ka miat jong ki.
U la ong ba ka Union ka dei ban pynbiang bha ïa ki kot ki sla, ban pule bniah ïa ki kyndon bad ki skhim jong ka Sorkar, bad ban pynsngew ïa ki jingeh jong ki sha ki bor kiba dei khmih lyngba ki dorkhas kiba shai bad kiba pura.
Shuh shuh u Bah Sutnga u la bynrap ba ka jingïakren kaba don jingmut bad ka Sorkar lem bad ki tnat kiba dei khmih ka long kaba donkam eh ban ïoh ïa ka lad pynbeit kaba hok ïa ki jingeh jong ki nongtrei.
U la ban jur ruh ïa ka jingdonkam ban pynkhlaiñ ïa ka Union ha baroh ki kyrdan bad ban pynsngewthuh ïa ki dkhot shaphang ki hok kiba la ai da ka aiñ. U la ong ba ïa ki jingeh bad ki jingdawa kiba shongnia jong ki nongtrei lah ban bishar bad pynbeit katkum ki aiñ, ki kyndon bad ki polisi jong ka Sorkar.
Lah ban ong ba ki nongtrei Muster Roll ha kylleng ka Meghalaya ki la pynpaw ïa kiba bun ki jingeh, kiba kynthup ïa ka jingslem ban ïoh tulop, ka jingpynbeit thymmai ïa ka Variable Dearness Allowance (VDA), ka jingpynskhem ïa ka kam, ki jingmyntoi hadien ka shongthait bad kiwei kiwei ki jingmyntoi kiba dei hok jong ki nongtrei.
U Sutnga u la kyntu ïa ki dkhot ka Union ba kin long kiba ïaishah, kiba don akor bad kiba skhem jingmut ban ïai buddien ïa ki jingdawa haduh ba ka Sorkar Jylla kan pynbeit ïa ki jingeh kiba shongnia jong ki.