Ngi ïakynduh shibun ki jingeh, ka tulop, ka jingshngaiñ ka kam bad kiwei ong ki nongkitkam

Shillong, Nailur 04: Ka All Meghalaya Muster Roll Progressive Workers’ Union (AMMRPWU) ka la pynbna ïa ki nongkitkam ba thymmai jong ka, ha kaba la jied ïa u N.K. Lanong kum u President.
Ïa u Ben Johnson Blah, u Dalseng bad u Adyen John la jied kum ki Vice-President, katba ïa u Bympher Lyndem la jied kum u General Secretary.
Ïa u Bankerlang Kharrngi, u Dalseng Sangma bad ka Euginia Wallang la jied kum ki Assistant General Secretary. Ïa ka Wanda Majaw la jied kum ka Treasurer, u John Kennedy Lyngkhoi kum u Finance Secretary, u Pynskhem Shangdiar kum u Publicity Secretary bad u Wanphai Nongkseh kum u Joint Secretary.
U Advocate Erwin Syiem Sutnga, Co-Chairman ka State Law Commission, Sorkar Meghalaya, un shakri kum u Adviser ka Union.
Ka Union ka la pynbna ruh ba ki dkhot ka Executive Committee kin long hi ki President, Secretary bad kiwei kiwei ki nongkitkam jong ki Unit bapher bapher jong ka.
Ka AMMRPWU ka la pynskhem biang ïa ka jingkut jingmut ban wanrah ïa ka jingïatylli, ka jingïatreilang bad ka roi ka par, ha ka jingïakhun ban ïada ïa ki hok bad ka bha ka miat jong ki nongtrei Muster Roll ha kylleng ka Meghalaya.
Ha ka jingïalang ki dkhot jong ka AMMRPWU ki la ïakren ïa ki jingdawa jong ki nongtrei bad pynsngew ïa ki jingeh jong ki.
Ka All Meghalaya Muster Roll Progressive Workers’ Union (AMMRPWU) ha ka General Meeting ban ïakren halor ki jingeh kiba la slem jong ki nongtrei Muster Roll kiba shakri ha ki tnat Sorkar bapher bapher ha kylleng ka Meghalaya.
Haba kren na ka liang ka Union, u President N.K. Lanong bad u General Secretary Bympher Lyndem ki la ong ba ki nongtrei Muster Roll ki dang ïakynduh ïa kiba bun ki jingeh kiba ïadei bad ka tulop, ki jingmyntoi ha ka kam, ka jingshngaiñ jong ka kam bad ka jingbym ïoh ïa ka jingshakri kaba ïaryngkat hapdeng ki tnat bapher bapher.
Ki nongïalam ki la ong ba ka Union kan lum lang ïa baroh ki jingeh jong ki nongtrei na ki tnat bapher bapher, nangta kan sa aiti ïa ki jingdawa sha ka Sorkar Jylla bad sha ki bor kiba dei khmih.
Ki la ban jur ba baroh ki nongtrei kiba bit ban ïoh ïa ki jingmyntoi ki dei ban ïoh ïa ka hok bad ka jingshakri kaba ïaryngkat, khlem da kheiñ ïa ka tnat kaba ki trei.
Ha ka jingïalang la ïakren ruh halor ka jingpynkhlaiñ shuh shuh ïa ka Union bad ka jingawi ïa ka Action Committee ban buddien ïa ki jingdawa. Ki nongïalam ki la kyntu ïa baroh ki nongtrei Muster Roll ha kylleng ka Jylla ba kin ïatylli bad shim bynta shitrhem ha ki programme jong ka Union.
Ka AMMRPWU ka la pynpaw ba kan ïai leit sha ka Sorkar lyngba ki lad kiba dei katkum ka aiñ bad ka synshar paidbah. Ka la kyrpad ruh ïa ki bor Sorkar ba kin pynlong ïa ka jingïakren kaba don jingmut bad ka Union, bad ban wanrah ïa ki lad kiba lah ban pynbha ïa ka rukom treikam, ka jingshngaiñ bad ka bha ka miat jong ki nongtrei Muster Roll.