EJHDFA: Rung semi final ka Moonongtdu haka 3rd Div’n, ka SWO Moosianglamare Old haka 2nd Division

Jowai, Nailur 04: Ka Moonongtdu SC haka 3rd Division, ka SWO Moosianglamare Old SC ki la jop ïa la ki jong ki jingïakhun Quarter Final ha ka lympung ïalehkai Third Division bad Second Division 2026 jong ka East Jaiñtia Hills District Football Association (EJHDFA), ba la long hynne ka sngi Thohdieng (04 tarik u Nailur, 2026) ha madan Artificial Ground Diengshynrum, Khliehriat.
Haba phai sha ka Quarter Final jong ka 3rd Division hapdeng ka Moonongtdu SC bad ka Nongthymme SC, ka jingïakhun ka la ïakhaid mar 1-1 kol haduh kaba kut.
Ka Moonongtdu ka la pynkhihjar ha ka khyllipmat ba khatduh lyngba u Etilast Lyngdoh (80+2’) ban pynïakhaid hadien ba ka Nongthymme ka la lamkhmat na ka shi kol jong u Berial Lapasam (78’). Kane ka la pynlong ïa ka rai ban jam sha ka Tie Breaker ha kaba ka Moonongtdu ka la khur ïa ka jingjop da 3-2.
Katba haka Quarter Final jong ka 2nd Division ka SWO Moosianglamare Old SC kala pynliem noh da 2-0 kol ïaka Narwan SCSC da kaba pynkhihjar ha baroh ar tylli ki kylla. U Regency Lapasam (18’) u la thep ïa ka kol kaba nyngkong bad u Pyniar Pusein (53’) u la thep ïa kaba ha ka kylla miet.
Da kane ka jingjop baroh ar tylli ki kynhun ki la buh ïa ka jaka ha ka jingïakhun Semi Final jong ka lympung ïalehkai 3rd Division & 2nd Division, bad haka juh ka por, baroh ar kynhun ki la pynthikna ïalade ban shah kyntiew kyrdan haka samoi ïalehkai jong u snem ban wan (2027).