Ha ka por ba thnem bha ka khubor leit pynïasoh BJP ki MLA UDP, bluit mih u Bah Paul Lyngdoh

Shillong, Nailur 03 : Ka jingïakren halor ka jingmih khubor leit pynïasoh BJP noh jong ki 9 ngut ki MLA ka UDP ha ka jylla ka la nang shai nang shai hadien ba na ka liang u Working President ka Party, Bah Paul Lyngdoh ba dei ruh u MLA ka West Shillong u la mih shakhmat ban kren sha ki paidbah.
“Baroh ar tylli ki jingïalang nga khlem leit ban don lang tangba ïa ka kynhun pat la ïalam da u para MLA jongngi. Tangba kumno ka kam kan tyllun ha kine ki taiew ban wan ngam nang ong namar ka kyntien ka ong ba ka shi-taïew ka dei ka por kaba jlan bha ha ka saiñpyrthei ,” ong u Bah Paul haba kren bad ki lad pathai khubor.
Halor ka jingkylli, u Bah Paul u la bynrap biang da kaba ong, “Tang kawei kaba shai bha ka long ba ka jingnoh arsut jong ka UDP bad ka jingkiew jong kawei pat ka seng saiñpyrthei trai ri, ka VPP bad ka jinglah ban kiew jong ka BJP lada ka lah ban ïoh ki 9 ngut ki ban ieh, kine ki dei kiei kiei ba lada phi wad bniah hi phin lap.”
Shuh shuh haba kylli ki mat jingdawa ba ka kynhun ka buh hakhmat ki nongïalam ba rangbah jong ka BJP, u Bah Paul u la ong, “Nga ruh ha ïohi ha ki lad pathai khubor ba kane ka kynhun ka la leit ban kren halor ka FCRA, halor ka Ktien Khasi ba kan rung ha ka Khyrnit kaba Phra bad baroh ki san tylli ki mat ba ki pynsngew ha u Amit Shah ïa kiba la dep ban paw pyrthei lut ha ki lad pathai khubor.”
Kumta, u ong ba ïa ki jingtip kiba bniah halor kane ka bynta jong ka jingïakynduh bad ki heh ka BJP kan dei beit tang lyngba na kito kiba kynduh markhmat bad u Amit Shah.
U Bah Paul haba jubab ïa ka jingkylli ba lano ki MLA ka UDP kin leit ban pynïasoh noh sha ka BJP, u la ong, “Hynrei lano bad kumno ka rukom, nga ruh ngan ym don ka jingtip namar kadei ka kynhun kaba leit la ka jong ha baroh ar tylli ki jingïalang kata ha Delhi bad Kolkata kaba manga nga khlem leit.”
Shwa kane, u Bah Paul u la ong ba ka jingmih kine kiei kiei ki la sdang ban nang jur hadien ka jingïalang jong ka General Executive Council jong ka UDP kaba dang shu lah shen hadien ba baroh ki la pynpaw ka jingbynñiaw halor ka jinglong jingman jong ka party. “Ki la pynpaw ruh ba kim ïohi ïa ki dak ki shin jong ka jingnang san jong ka party. Kumta, nga tharai kata ka long ka daw ba la mih kum kine kiei kiei,” u la ong.
Nangta u la ong ruh ba kum u briew uba ju mlien ban pynpaw beit markhmat, u la pynpaw markhmat ha ka General Council da kaba pan ïa ka jingtreikam (progress report) jong ki Myntri jongngi baroh arngut hadien ka jingkylliang shuki Myntri.
“Nga ngeit ba kata ka dei ka daw ba baroh ki lynga bad pisa bad dum jingmut namar ka jingbym ïohi ïa ka jingshai bad ka jingïaid shakhmat jong ka party. Dei kane ka daw kaba pynlong ïa ki para MLA ban peit da kawei pat ka lynti ïaid,” u la bynrap biang.
U la ong ba ha ki ar snem shiteng ba u la long Myntri kam shym don ka dak orpait jong ka UDP kaba paw shabar, hynrei mynta tang shisnem ym pat don ba la kylliang Myntri ka mih kat kane ka khubor bad katkum ki khubor ba la tip bad ïa bna paidbah lut ka long ba nalor kine, ki dang don sa ar ngut ki ban rung sha kawei pat ka seng saiñpyrthei.