Kynjah beit slam slam ha South Garo Hills ba don ka NCM u paidbah ba ar sngi

Williamnagar, Nailur 02 : Ka South Garo Hills kala pynlong da ka Non-Cooperation Movement (NCM) u paidbah ba arsngi, ha baroh kawei ka district ha ka sngi Ba-ar, ban dawa ïa ka Sorkar ba kan maramot bad pyntrei noh mardor ïa ka National Highway-62 kaba la jot rathai.
Ïa kane ka jingiakhih la khot pynlong da ki kynhun Sengbhalang ka District ba kynthup ïa ka Garo Students’ Union, South Zone; Federation of Khasi Jaintia and Garo People; ADE; AYWO; AHAM; NGCO; bad APA, nalor ki seng jong ki kali kamai kiba la ai ka jingkyrshan.
Ka surok NH-62 ka sdang na Negkra sha Bahhmara bad sha kiwei ki jaka ka South Garo Hills bad Baghmara sha Dimapara.
Kum shibynta jong kane ka jingiakhih, ki dukan baroh kila khang khyrdep bad ka ïaid ka ieng jong ki kali ruh kala kynjah bha slam ha baroh ki jaka jong ka district.
Ha Siju, ki dukan kila khang khyrdep lut bad la pyntip ba um don kawei ruh ka kali ka ban ïaid ha ki surok.
Ha Baghmara, ka headquarters ka SGH, kiba bun ki dukan kila khang khyrdep bad ki surok kila thylli, lait noh tang ki katto katne ki kali shimet.
Kane kajuh ka jinglong jingman la sakhi ruh ha Nongal Bibra, ha kaba bun ki dukan kila khang khyrdep bad ym don satia wat kawei ruh ka kali heh ka ban ïaid, lait ki kali rit jong ki riew shimet la shah ba kin ïaid tang ha ki kam ba long kyrkieh.
Ki paidbah ka SGH kila mad ïaka jingeh kaba la slem bha namar ka jingsniew palat ka surok NH-62, kaba dei ka surok kaba kongsan bha hapoh ka thain.
Kine ki seng kila pynpaw ba kane ka jingiakhih ka pyni ïa ka jingbitar kaba nang jur hapdeng ki paidbah namar ka jingieh noh bein ïa ka highway bad dawa ïa ki bor khmih ba kin leh eiei noh mardor.