Pyrshah ka Baghmara Bar Association ïa ka jingdawa weng ïa u Advocate General ka Jylla

Baghmara, Nailur 1 : Ka Baghmara Bar Association ka la kyntait ban kyrshan ïa ka jingdawa ban weng noh ïa u Amit Kumar kum u Advocate General ka Jylla, bad ong ba ka shem ba kam don nongrim ban kyrshan ïa kane ka jingdawa haba bishar ïa ka jingujor pyrshah ïa u bad ka jubab jong u.
Ha ka jingpynbna ba pynmih ha ka sngi Ba-ar, ka Association ka la ong ba kala shong pyrkhat ïa ka jingkyrpad jong u Secretary ka Meghalaya High Court Bar Association bad kiwei ki Bar Association ki District, ban kyrshan ïa ka jingdawa weng ïa u Kumar.
Ka Association ka ong ba hadien ka jingpule bniah ïa ka ujor bad ka jubab u Advocate General, ka shem ba ka kajia ka dei kaba mih hapdeng u Advocate General bad u Advocate ha ka jingïakhun mukotduma kaba dang don ha ka jingbishar hapoh ka ïing Bishar.
“Hadien ba bishar bha ïa ka, la shem ba ka kajia ka dei hapdeng u AG bad u Advocate jong kawei ka mukotduma ba dang don ha ka jingbishar ha High Court” ong ka jingpynbna.
Kala bynrap ba ka Association “kam shym la shem ïa kano kano ka nongrim kaba khlaiñ” ban kyrshan ïa ka jingdawa weng ïa u Advocate General.
Kala pyntip ruh ba ki nongïasaid aiñ ka Baghmara kin nym ïashimbynta satia ha ka jingsangeh trei ne ban pyndep ïa ki kam ha ïing Bishar
Ka Baghmara Bar Association kala kyntait ruh ban ïasnohkti ïa ka jingkhot sangeh leit ïasaid mukotduma ha ki ïing Bishar haba kdew ïa ka hukum ka ïing Bishar ba pyrshah ïa ka jingïakhih ki nongïasaid aiñ.
Ka Baghmara Bar Association kala bthah ïa baroh ki dkhot ba kin bud ïa ka aiñ bad ki kyndon bala buh da ka Supreme Court.