La bthah ban ujor ejahar ïa ki nongpynïaid ïakob khwai dohkha ha Mawryngkneng: DC EKHD

Shillong, Nailur 01: U Deputy Commissioner ka East Khasi Hills District u Abhilash Baranwal u la ïathuh ba na ka daw ba la suk ka saiñ ka la wanphai biang hapoh Nongbah Shillong la wengnoh ïa ka jingdon ki pulit Rapid Action Force (RAF) bad ki pulit Central Reserve police Force (CRPF) ban pahara ïa ka Nongbah Shillong.
Ïa kane u la ong haba ïakren bad ki lad pathai khubor ha ka sngi baar hadien ba ka KSU ka la pynsangeh shwa shipor ïa ki prokram ïakhih hadien ba ka sorkar ka la pdiang jan baroh ki jingdawa jong ka.
U DC u la ïathuh ruh ba ka jingwan kiba jngohkai pyrthei sha ka Jylla khamtam ha East Khasi Hills ka la kiew ha kaba ka jingphah buh kamra lypa ha ki hotel ka la sdang ban kiew biang mynta naduh ba ka suk ka saiñ ka la wanphai biang mynta la kumba 13 Sngi eiei.
Haba kylli pat haba ïadei bad ki mukotduma ba la pynngat shuh shuh ïa ki nongïalam jong ka Khasi Students Union, na ka liang u DC u la ong ba ïa kane ka jingtip kaba kham bniah dei tang u Superintendent of Police ka East Khasi Hills uba lah ban ai ki jingtip kiba bniah.
Ha kawei pat ka liang u Deputy Commissioner u la ïathuh ba la bthah ïa ki pulit ka Mawryngkneng ban ujor ejahar ïa ki nongpynïaid ka jingïakob khwai dohkha bad ka Lucky draw ha kawei ka pung dohkha ha katei ka thaiñ hadien ba la wanrah ïa ka jingdheng kali kaba la neh da ki kynta ha ka sngi Saitjaiñ u bnai Nailar.
U DC u la ïathuh ruh ba la dep phah bad ai ïa ka show cause notice sha ki nongpynïaid halor kane ka jingshah pynthut ka ïaid ka ïeng ki paidbah bad kumjuh ka jingdheng kali kaba jur bha ha kane ka sngi.