Ka NPP ka ïapher na kiwei ki Seng Saiñ Hima ka dei kaba sngap ïa ka Sur u Paidbah: Sngewbhalang

Shillong, Nailur 1 : U National Vice President ka National People’s Party (NPP) bad Symbud Myntri Rangbah u Bah Sniawbhalang Dhar ha ka sngi Ba-ar, ula ong ba ka NPP ka ïapher na kiwei pat ki seng saiñ pyrthei namar ka dei kaba sngap ïa ka sur u paidbah bad kam ju kiar na ka ban pynkylla ïa ki rai na ka bynta ka bha ka miat u paidbah.
Haba kren ha ka jingrakhe sngi seng ba 14 jong ka NPP, kaba hap lang bad ka jingrakhe dap 79 snem jong u nongseng (L) u Purno A Snagma, u bah Sniawbha ula ong ba ka NPP ka ïapher na kiwei pat ki seng saiñ pyrthei.
“Ka NPP party jong ngi ka ïapher na kiwei ki party. Kam pher haduh katno ki kawang maw ïa ngi, kam pher haduh katno ngi shah tynjuh ha u slap bad ka eriong, ngi ïeng rasong ban trei la ka kam na ka bynta ki paidbah baieid ka Meghalaya. Kane ka dei ka jingïapher ka party jong ngi, ka jingkyrkhu na u Blei” ong u bah Sniawbha.
Ula ai ka jingïaroh ïa ka jinglong nongïalam u Myntri Rangbah u Conrad K Sangma bad u Symbud Myntri Rangbah Bah Prestone Tynsong, haba ong ba kam ju don ka jingïasngew pher jingmut hapdeng ki nongïalam ka party.
“Ngim ju don ka jingïapher jingmut hapoh ka jingïalam u Myntri Rangbah Conrad K Sangma bad u Symbud Myntri Rangbah u Bah Prestone Tynsong. Ngi sngewthuh ba kam dei kaba suk ban shim rai, hynrei ka NPP kum ka party ka sngap ïa ka sur jong u paidbah” ula ong.
“Katto katne ki ong ba kane ka party ka tiengpyut namar ïa kat kiba don ki jingdawa ka ai beit. Hynrrei kane ka dei namar ngi don ïa ki nongïalam kiba ïohi jngai. Ngim ju phet rieh na ki jingshisha, ngim ju don ka jingshynraiñ ban pynkylla ïa ka rai jong ngi lada ka dei na ka bynta ka bha ka miat ki briew jong ngi” ula bynrap.
Haba kren halor ka rai ba dang shen jong ka Sorkar, u Bah Sniawbha ula ong “Ha kine ki lai-saw sngi bala leit noh, ngi la lah ban mynjur ïa ka resolution pyrshah ïa ka jingtih uranium ha Meghalaya. Lada ngi khmih ha ka Meghalaya Amendment Bill, Official Language Bill, ngi dei ban ai khublei ïa u Dr DRL Nonglait, uba dei u riew rangbah uba la ai jingmut ïa ka Sorkar”.
U ong ba dei ka NPP kaba la wanrah ïa ka resolution ban dawa pyntreikam ïa ka Inner Line Permit (ILP) hapoh ka Jylla.
Haba pynpaw ba ka long ka burom kaba khraw ban burom ïa u (L) PA Sangma ha ka jingdap sngi kha ba 79, u Bah Sniawbha ula ong “Ha ka rta ba dang samla ula shah jied kum u nongïalam ka Jylla, khamtam na ri-lum Garo. Ula bat ïa ki kyrdan bapher bapher- kumno ban ïalam ïa ka thaiñ Garo, kumno ban ïalam ïa ka Meghalaya, kumno ban ïalam ïa ka thaiñ Shatei Lam Mihngi. Ula long u Myntri Rangbah ka Jylla, Myntri ka Sorkar Pdeng bad Speaker barim ka Lok Sabha. U nongseng jong ngi ula ieh shadien ïa bun ki matti kiba ngim dei ban klet”.
Halor ka kam khappud, u Bah Sniawbha ula ong “Ka dei ka kam kaba ym don mano mano ruh ba nud ban ktah, khamtam hashuwa ka elekshon. Katto katne ki nongïalam ki ong ba lada ngi ktah ïa kane ka kam ngi lah ban rem elekshon. Nga kynmaw ïa u Myntri Rangbah bad u Bah Prestone Tynsong kiba ong ba lada ngi rem na ka bynta ka bha ka miat ka Jylla, ai ba ngin rem. Ngim shym la artatien bad ngi la leh ïa ka. Ngim shym ong ba ngi la lah ban pynbeit ïa baroh ki jaka ba don jingïakajia, hynrei ngi la pyrshang kat kaba lah. Ngi la pyndep ïa ka bynta ba nyngkong ban pynbeit haduh 6 tylli ki jaka bad mynta ka bynta kaba ar ka dang ïaid”.
U Bah Sniawbha u pyntip ba ka Sorkar kala pynlait ïa kumba 35 tylli ki skhim bhalang ka imlang sahlang ha kine ki phra snem bala leit noh bad kynthup ïa ka CM-Elevate, PRIME Hub, YESS Meghalaya, Hello Meghalaya bad CM-Assured.
Ula kren ruh ïa ka rai jong ka kynhun Myntri ban pynduh noh ïa ka personal interview ha ka thung kam Grade C bad D hapoh ka District Selection Committee (DSC) ban pynthikna ia ka jingthungkam kaba shai.