Kyrshan ka 67 BN CRPF Shillong ïa ka RIAS Nongpoh ban plielad ïa ki samla baduk

Nongpoh, Nailur 01: Ka Regional Institute of Advanced Studies (RIAS), Nongpoh, kaba dei kawei na ki shlem ai jinghikai ïa ki samla pule ha Ri-Bhoi, ka la pynlong ïa ka jingïalang sam syrnod sha ki samla kiba la pyndep ïa ka Fundamentals of Computer and Microsoft Office, kaba la pynlong hapoh ka RIAS Institute, Nongpoh.
Ïa kane ka prokram ai jinghikai kaba shi bnai, kaba long khlem jingsiew, la kyrshan da ka 67 BN CRPF Shillong, kum shibynta ka Civic Action Programme da ka jingthmu ban plie lad ïa ki samla, khamtam ïa kito kiba duna ka ioh ka kot, ban ïoh ka lad ban kyntiew ïa ka jingnang jingtip bad ban ïoh jinghikai ba kongsan halor ka jingpyndonkam ïa ki kor Computer bad ki don kumba 14 ngut ki samla pule kiba la pyndep jinghikai naka jingkyrshan ki shipai CRPF.
Ha ka jingïalang sam syrnod, u Jai Singh, Commandant, 67 BN CRPF Shillong, u la wan kum u Kongsan, ryngkat ka jingïadonlang u Ajit Singh, Inspector E/67 BN CRPF Nongpoh, bad u Bah Skhem B. Swett, Director ka RIAS, ha ka jingïadon bynta lang jong ki samla kiba la pyndep ïa kane ka jinghikai.
Haba kren ha ka jingïalang, u Jai Singh u la ai ka jingïaroh ïa ki samla pule kiba la shim ïa ka sienjam ban nang pynkhlaiñ shuh shuh ïa ka jingnang jingtip jong ki, khamtam ha ka liang ki jingtip ba ïadei bad ki Computer, nalor ki jingpule ba ki ïoh hapoh ki skul bad ki kolej.
U la ong ba ka jingnang jingtip ïa ka Computer ka long kaba donkam bha ha kane ka juk kaba mynta, bad u la ai mynsiem ïa ki samla kiba la pyndep ïa ka Basic Computer Course ban ym kut tang hangne, hynrei ban bteng ïa ka jinghikai bad ban pynjanai shuh shuh ïa lade ha ki kyrdan kiba kham shaneng.
Na ka liang u Bah Skhem B. Swett, Director ka RIAS, u la ong ba ka jingpynlong ïa ki Computer Training Course khlem jingsiew ka long kawei na ki lad ban ai ka kabu ïa ki samla, khamtam ïa kito kiba duna ka ioh ka kot hynrei kiba don ka jingkwah bad ka jingthrang ban nang ïa ki jingtip kiba ïadei bad ka teknoloji.
U la pynpaw ba ha ka juk mynta, ka jingnang jingtip ïa ka Computer ka long kawei na ki jingtip kiba kongsan bha ha ka jingim bad ha ka jingpyrshang ban ïoh kam. Ki samla kiba la pyndep ïa ki jingpule jong ki ki lah ban shem jingeh ban ïoh kam lada kim don ki jingnang jingtip bad ki skill kiba ïahap bad ki jingdonkam jong ka juk mynta.
U Bah Swett u la pynshlur ïa ki samla ban shimkhia ïa ka jingnang jingtip ïa ka teknoloji bad ban bteng ïa ka jingpule bad jinghikai jong ki, khnang ba kin lah ban pynkhreh bha ïa lade na ka bynta ki lad ioh kam bad ka lawei jong ki.