Dang ïatylli baroh 12 ngut ki MLA ka UDP ym don jingpynïasoh sha ka BJP ong u bah Metbah
Shillong, Nailar 31 : Ha kaba ïadei bad ki khubor ban don ka jingkyntiap seng jong kiba bun ki MLA sha ka BJP, u President ka UDP Bah Metbah Lyngdoh ha ka Lah Sngi U Blei ula ong ba baroh ki 12 ngut ki MLA ki dang ïatylli mlon ha Jylla bad kam don kano kano ka jingthmu ban leit pynïasoh sha ka BJP
“Kam don satia kano kano ka kynrum kynram ha ka UDP kat haduh mynta. Nga la ïakren hi ïa baroh ki MLA, ym lyngba kiwei pat, bad ym don uwei ruh na ki ba ong ba kin leit ïasoh BJP. Nga ïoh sngew ïa kane tang ha ki lad pathai khubor” ong u Bah Metbah.
U ong ba ki jingïakren ba khyndai ngut ki MLA kin leit ïasoh sha ka BJP ka dei tang ka jingmutdur hi. “Ki jingmutdur kan ïai neh ka jingmutdur. Ngan ïathuh haphi tang ïa kaei kaba jia” ula ong.
Halor ka khubor ba ki MLA ka UDP kila hiar kyrkieh sha Delhi ha kine ki arsngi bala leit, u Bah Metbah ula ong “Kane ka long kaba sngewsih bad ka bym dei satia. Nga don ha Shillong baroh shi taiew. Nga leit sha Delhi tang ha ka Lah Sngi U Blei jong ka taiew ba la lah na ka bynta ki prokram Sorkar. Ki khubor ki ong ba Nga la donlang ha Delhi bad ki MLA ha kine ki arsngi, ka dei kaba bakla”. U ïathuh ba ka jingleit Delhi dang shen ka dei namar ka FCRA.
“Khyndai ngut ki MLA ki la ïakynduh ïa u Myntri kam Pohïing halor ka FCRA Amendment ha Parliament” ula ong.
Halor ka khubor ba ki MLA ki sah ha Guwahati bad Kolkata, ula pynshai, “Saw ngut ki MLA- Bah Renikton, Pius Marwein, Balajied Synrem, Kyrmen Shylla bad Synshar Lyngdoh- kila leit sha Kolkata ha ka janmiet sngi Thohdieng namar ki kam shimet ym ka kam saiñ pyrthei”.
“Kiwei pat ki MLA ki don lut ha Shillong. U MLA ka Mawphlang Bah B Kurbah u don ha Shillong, u MLA ka Mawsynram Olan Sing Suin u don ha Ophis ha Shillong, u Bah Lahkmen Rymbui u don ha Shillong. Kumta, ka khubor ba ki ïa hiar sha Guwhaati ban ïakynduh ia ki nongïalam ka BJP ban ïapyn beit khatduh ïa ka jingïasoh ka dei kaba bakla bad ka bym shisha”ula bynrap.
U Bah Metbah ula ong ba kam shym la don satia kano kano ka jingbym sngewtynnad halor ka jinglong nongïalam jong u. “Nga la ïakynduh ïa baroh ki MLA bad kylli ïa ki. Ym don mano mano ba pynpaw ïa ka jingbym sngewhun ïa ka jinglong nongïlam jong nga. Ki ïakmen lut baroh haduh mynta” ula ong.
Ula kyntu ia ki lad pathai khubor ban da pynshisha. “Sngewbha pynshisha hashuwa ban shna ïa kano kano ka khubor, lym kymta kan phah ïa ka khubor kaba bakla sha ki paidbah” ula ong.