Ba kren ïa ki jingshisha hapoh ka jingïalang jong ka Seng sa shah sospon na ka VPP : Snarbor

Shillong, Nailar 31: U Nongïalam barim ka Voice of the Peoples Party (VPP) na ri-lum Jaintia u Bah Snarbor Laloo ula leit ai jingkyrshan ïa u kyrtong ka NPP u Dr DRL Nonglait ban ïakhun ia ka elekshon shiteng samoi na ka Shillong Lok Sabha Parliamentary Constituency bad ong ba u kyrshan ïa u briew ym ïa ka seng.
Haba kren ha ka rynsan ïalap elekshon ha Lawbyrtun ha Mawthadraishan ha ka Sngi Saitjain, u Bah Laloo ula ong, ba ula shah suspon na ka VPP ryngkat bad u MLA ka North Shillong Bah Adelbert Nongrum namar ba ula kren ïa ka jingshisha ha ka jingïalang jong ka seng.
“Ka lynti ïaid ka jong nga bad ka VPP, nga lah sdang ban ïohi ïa ki dak jingkylli. Nga ju ïakren bad u President Bah Ardent Miller Basaiawmoit. Hadien ba nga lah ïakren markhmat ha ka jingïalang jong baroh ki nongïalam na Khasi-Jaintia, nga lah shah suspon noh” ula ong.
“Ka long ka jingkyrkhu kaba na sha lyndet. Hadien ba lah shah suspon, ngi lah long laitluid bad ngi lah ban kyrshan ïano ïano ruh” ong u Bah Laloo.
Ula ong ba ka rai ka jongu ban kyrshan ïa u Dr Nonglait ka dei hadien ba ula dep ban wad bniah bha.
“Nga lah wad bniah bha bad shem ba u long u briew uba biang bad uba lah leh bun ki kam khlem da bun ktien than. Kam pher lada u phong ïa kano kano ka uniphom, ngi donkam ïa kum une u briew. Ngam sngew ei ei ïa kano kano ka seng, nga kyrshan ïa u Dr Nonglait,” ula ong.
U Bah Laloo ula buh jingkylli ruh ia ka seng VPP kaba la tuklar halor ka jingshim rai kaba dei ka kam ïing kam sem jong ka NPP.
“Balei ka VPP ka hap ban kylli, balei ka NPP kam phah ïa u Dr Nonglait sha Rajya Sabha hynrei sha Lok Sabha? Ka dei ka hok jong ka NPP ba kan pynïeng dano dano ruh. Balei ban tuklar ïa ka kam jong kawei pat ka seng? Kane ka jingkylli ka dei tang ban ïalam bakla ïa u paitbah” ula ong.
Da kaba ïada ïa ka NPP ba ka ju mlien ban pynlong ïa ka jingbuh jingduwai hashwa ban pynbna kyrtong, ula ong, “Kum ki briew ngi don bun ki jingduna bad ngi donkam ïïa u Blei”.
Haba ïaroh ïa u Symbud Myntri Rangbah u Bah Sniawbhalang Dhar, u Bah Laloo ula ong, “Watla nga dei uba trei shitrhem ïa ka VPP, nga lah ïohi ïïa ki kam kiba bun kaba u Bah Sniawbhalang ula leh ha ka constituency jongu. Kaei kaba dei hap ban ïaroh bad ïa kaei kaba bakla dei ban kynthoh. Nga ai khublei ïa u halor ka jingkyntiew ïa kane ka thaiñ”.
Ula kob ruh ïa ka VPP, da kaba ong, “Balei phim shim la leit khot hi dalade ïa u Dr Nonglait?”