Shillong, Nailar 27 : Ka High Powered Committee, ha ka Sngi Palei, ka la bishar bniah ïa ka jingïaid shakhmat jong ki kam bad ïadei bad ka jingtei ïa ka ïing Dorbar Thymmai jong ka Jylla Meghalaya, kum ka jingbud ïa ka jingïalang kaba la long mynshuwa ha ka 18 tarik Nailar.
Ïa ka jingïalang la pynïaid da u Lamphang ka Iing Dorbar Thawain ka Jylla Thomas A Sangma, bad la ïashim bynta lang da u Myntri Rangbah ka Jylla Conrad K Sangma; u Deputy Speaker Limison Sangma, ki Symbud Myntri Rangbah ba kynthup ïa u Bah Prestone Tynsong bad u Bah Sniawbhalang Dhar.
La donlang ruh naduh u Nongïalam ka Liang Pyrshah Dr. Mukul Sangma, nangta kiwei ki MLA ba kynthup ïa u Bah Banteidor Lyngdoh bad u Rupert Momin, u Chief Secretary, Dr. Shakil P. Ahammed bad u Secretary ka Meghalaya Legislative Assembly Malthus S Sangma; u Dr. Andrew Simons, Adviser (Legislation); u Deputy Secretary Bah Raja Kharpuri; Bah Cyril V. Darlong Diengdoh, Commissioner & Secretary, Parliamentary Affairs Department; u Dr. Vijay Kumar D, Commissioner & Secretary, Finance; ryngkat bad ki ophisar na ka PWD bad na kiwei pat ki tnad treikam jong ka Sorkar Jylla.
